ლუქსემბურგის დიდი საჰერცოგოს ახლადდანიშნულმა ელჩმა ფლორენც ენშმა - (რეზიდენციით ლუქსემბურგი) საქართველოს საგარეო საქმეთა მინისტრის მოადგილეს ვახტანგ მახარობლიშვილს რწმუნებათა სიგელების ასლი გადასცა.

რწმუნებათა სიგელების ასლის გადაცემის შემდეგ შედგა მინისტრის მოადგილის შეხვედრა ელჩთან. ვახტანგ მახარობლიშვილმა ლუქსემბურგელ დიპლომატს მიულოცა ახალ თანამდებობაზე დანიშვნა და წარმატებები უსურვა მომავალ საქმიანობაში. ამასთან, მინისტრის მოადგილემ ხაზი გაუსვა 20 თებერვალს მინისტრ ჟან ასელბორნის საქართველოში ვიზიტის მნიშვნელობას.

მხარეებმა მიმოიხილეს ორმხრივი და მრავალმხრივი თანამშრომლობის დღის წესრიგი. განსაკუთრებულად აღინიშნა საქართველოს ევროპული და ევრო-ატლანტიკური ინტეგრაციის საკითხები. ახლადდანიშნულმა ელჩმა დაადასტურა ლუქსემბურგის მტკიცე მხარდაჭერა როგორც საქართველოს სუვერენიტეტისა და ტერიტორიული მთლიანობის მიმართ, ასევე ქვეყნის ევროპული და ევროატლანტიკური მისწრაფებებისადმი.

თავის მხრივ, ვახტანგ მახარობლიშვილმა მადლობა გადაუხადა ფლორენც ენშს ლუქსემბურგის მიერ გაწეული მხარდაჭერისათვის და გამოთქვა მზაობა არსებული თანამშრომლობის სამომავლოდ განვითარებასა და გაღრმავებაზე.