საქართველოს საგარეო საქმეთა მინისტრის, მიხეილ ჯანელიძის განცხადებით, ხელისუფლების მიზანი საერთაშორისო თანამეგობრობის მხარდაჭერის შემდგომ კონსოლიდაციაზე ქმედებების გაძლიერებაა.

ამის შესახებ ჯანელიძემ პარლამენტში სამი კომიტეტის გაერთიანებულ სხდომაზე სიტყვით გამოსვლისას განაცხადა.
„ჩვენი მიზანია საერთაშორისო თანამეგობრობის მხარდაჭერის შემდგომ კონსოლიდაციაზე ქმედებების გაძლიერება, რადგან აუცილებელია საერთაშორისო ორგანიზაციების და პარტნიორების წნეხის გაზრდა რუსეთზე, რათა მან შეასრულოს ნაკისრი ვალდებულებები“ - განაცხადა ჯანელიძემ.


საგარეო უწყების ხელმძღვანელმა მიმოიხილა ტერიტორიული მთლიანობის აღდგენისა და დეოკუპაციის მიმართულებით უწყების მხრიდან გასულ წელს გაწეული სამუშაოები და მიღწეული უპრეცედენტო შედეგები, ასევე ისაუბრა ამ მიმართულებით არსებულ სამომავლო გეგმებზე.

მიხეილ ჯანელიძემ ყურადღება გაამახვილა ჟენევის საერთაშორისო მოლაპარაკებებზე, მისი განცხადებით საქართველო განაგრძობს კონსტრუქციულ მონაწილეობას და ცდილობს წინსვლის მიღწევას მოლაპარაკებით გათვალისწინებულ ძირითად საკითხებზე: „ვცდილობთ, რომ ძირითად საკითხებზე, რაც ჟენევის საერთაშორისო მოლაპარაკებებზე, სამწუხაროდ უკვე ათი წელია შედეგის გარეშე განიხილება, გვქონდეს გარკვეული წინსვლა. წავიწიეთ წინ ძალის არგამოყენების განცხადებასთან დაკავშირებით, რომელზე მუშაობა მიმდინარეობს, თუ არ ვცდები, ბოლო 6 წელია. ჩვენი მიზანია შევძლოთ ისეთი განცხადების მიღება, რომელიც საშუალებას მოგვცემს გადავდგათ მნიშვნელოვანი ნაბიჯები ცეცხლის შეწყვეტის შეთანხმების შესასრულებლად, რომელიც რა თქმა უნდა პირველ რიგში უკავშირდება ჩვენი ტერიტორიების დეოკუპაციას, საერთაშორისო უსაფრთხოების მექანიზმების შექმნას და შესაბამისად ძალის არგამოყენების ვალდებულების შესრულებას. რა თქმა უნდა იძულებით გადაადგილებულ პირთა უფლებების დაცვა, მათი დაბრუნება და შესაბამისი პირობების შექმნა ასევე რჩება უმნიშვნელოვანეს საკითხად. ჟენევის საერთაშორისო მოლაპარაკებები პირველივე რაუნდიდანვე მოქმედებს სამუშაო ჯგუფების ფორმატში, ჩვენ აქტიურად ვაყენებთ საკითხს, ამ ფორმატის მაღალ დონეზე გამართვის შესახებ, მათ შორის პლენარულ ფორმატში გამართვის“ - განაცხადა მინისტრმა.

მიხეილ ჯანელიძის განცხადებით წარმატებით მიმდინარეობს არაღიარების პოლიტიკა და ქართული მხარე ცდილობს აღკვეთოს რუსეთის ნებისმიერი მცდელობა კერძო კავშირების მეშვეობით ხელი შუწყოს სეპარატისტული რეჟიმების უკანონო გადაადგილებას. „დღეს საქართველოს ტერიტორიული მთლიანობა არის მტკიცედ დაცული და ,აღიარებული, ჩვენ უნდა შევეცადოთ რომ რუსეთის მცდელობები, კერძო კავშირების მეშვეობით ხელი შეუწყოს აღიარებებს, არ იყოს წარმატებული და გავაგრძელებთ ამ საკითხზე მუშაობას“ - განაცხადა მინისტრმა. მისივე თქმით საქართველოს ხელისუფლება აქტიურ ნაბიჯებს დგამს შერიგების პოლიტიკის განსახორციელებლად, რაც იქნება მნიშვნელოვანი წინაპირობა შემდგომი წარმატებებისთვის.