დეპუტატ ზაზა ხუციშვილის განცხადებით, „მაუწყებლობის შესახებ“ კანონპროექტის საკითხზე გადაწყვეტილების მისაღებად დეპუტატებს არგუმენტები სჭირდებათ.

ჟურნალისტებთან საუბრისას, ზაზა ხუციშვილი, ასევე, გამოეხმაურა ნინო ჯანგირაშვილის განცხადებას იმის შესახებ, რომ პარლამენტის თავმჯდომარემ დეპუტატებს კანონპროექტის მხარდაჭერისკენ საერთო მიმოწერაში მოუწოდა.

„დგას საკითხი, უნდა დაძლიოს თუ არა პარლამენტმა პრეზიდენტის ვეტო „მაუწყებლობის შესახებ“ კანონპროექტზე. ამიტომ, დეპუტატებს სჭირდებათ არგუმენტები იმისთვის, რომ მიიღონ გადაწყვეტილება.

ასეთი რამ არ ყოფილა. როდესაც შევიკრიბეთ უმრავლესობის ფორმატში და პროექტზე ვიმსჯელეთ, იქვე წარმოიშვა აზრთა სხვადასხვაობა. ძალიან სწორი, დემოკრატიული გადაწყვეტილება იყო მიღებული, რომ დარბაზში ვისაც როგორ მიაჩნია სწორად, ისეთ გადაწყვეტილებას იღებს. ასეც მოხდა. სწორედ ამის შედეგი იყო, რომ 63 ხმით გავიდა ეს პროექტი“,- აღნიშნა ზაზა ხუციშვილმა.

საქართველოს პარლამენტის თავმჯდომარისა და მედია ორგანიზაციების წარმომადგენლების შეხვედრაზე, მედიაორგანიზაციების წარმომადგენელებმა განაცხადეს, რომ „მაუწყებლობის შესახებ“ კანონპროექტი უარყოფით შედეგებს გამოიწვევს. ირაკლი კობახიძემ კი მათ ამასთან დაკავშირებით, არგუმენტების წარმოდგენა მოსთხოვა, რის შედეგადაც შეხვედრა ტელეკომპანია „კავკასიის“ ხელმძღვანელმა, ნინო ჯანგირაშვილმა დატოვა.