საქართველოს საგარეო საქმეთა მინისტრი გრიგოლ ვაშაძე მიიჩნევს, რომ რუსეთი ცდილობს ინციდენტების პრევენციისა და მათზე რეაგირების მექანიზმის ფორმატს ზიანი მიაყენოს.
როგორც გრიგოლ ვაშაძემ დღეს, ეუთოს გენერალურ მდივანთან ლამბერტო ძანიერისთან გამართულ პრესკონფერენციაზე განაცხადა, საქართველოსთვის აღნიშნული ფორმატი ძალიან მნიშვნელოვანია.
„ჩვენთვის სრულიად გაუგებარია, რატომ ცდილობს რუსეთის ფედერაცია ზიანი მიაყენოს ამ სტრუქტურას და რატომ ცდილობს მოიპოვოს ვეტოს უფლება იმაზე, თუ ვინ უნდა იყოს ევროპის სადამკვირვებლო მისიის ხელმძღვანელი“ - განაცხადა ვაშაძემ.
მისი თქმით, რუსეთი არ ასრულებს ცეცხლის შეწყვეტის შეთანხმების არცერთ პუნქტს და განსაკუთრებით იმას, რომელიც მას ოკუპირებულ ტერიტორიებზე ევროკავშირის დამკვირვებლების შეშვებას ავალდებულებს.
როგორც ლამბერტო ძანიერიმ განაცხადა, ევროკავშირის სადამკვირვებლო მისიის ხელმძღვანელის ანჟეი ტიშკევიჩის მიმართ აფხაზური მხარის მიერ გამოთქმულ უნდობლობასთან დაკავშირებით, ის ევროკავშირისგან მკაფიო პოზიციის გამოხატვას ელოდება.
ამასთანავე, მან ყველა მხარეს კონსტრუქციულობისკენ მოუწოდა და განაცხადა, რომ აღნიშნული მექანიზმი მნიშვნელოვანია.