საგარეო ურთიერთობათა კომიტეტის თავმჯდომარე სოფიო ქაცარავა სომხეთის პარლამენტის საგარეო ურთიერთობათა კომიტეტის თავმჯდომარეს არმენ აშოტიანს და პარლამენტის წევრებს შეხვდა, რომლებიც თბილისში ევრონესტის საპარლამენტო ასამბლეის საკომიტეტო სხდომების ფარგლებში იმყოფებიან.

მხარეებმა სამეზობლო პოლიტიკის გაძლიერებასა და საპარლამენტთაშორისო ურთიერობების გაღრმავებაზე ისაუბრეს.

სოფიო ქაცარავამ ხაზი გაუსვა საპარლამენტო ასამბლეების ფორმატებში თანამშრომლობის მნიშვნელობას.

საქართველოს პალამენტის ინფორმაციით, შეხვედრაზე საუბარი შეეხო, ევროინტეგრაციის გზაზე ჩვენი ქვეყნის მიერ გატარებულ რეფორმებსა და ასოცირების შეთანხმების იმპლემენტაციის მიმართულებით საქართველოს გამოცდილებას.

მხარეები მომავალი თანამშრომლობის ფორმატზე შეთანხმდნენ, რომლის ფარგლებშიც სამეზობლო პოლიტიკის და ეკონომიკური კავშირების გაძლიერების საკითხები განიხილება და დემოკრატიის კონსოლიდაციის თვალსაზრისით, საქართველოს გამოცდილების გაზიარება მოხდება.

„საინტერესო შეხვედრა მქონდა ჩემს კოლეგასთან, სადაც განვიხილეთ რიგი საკითხებისა, მათ შორის ორმხრივი და მრავალმხრივი თანამშრომლობის გაძლიერების საკითხები. ჩვენ მზად ვართ პარტნიორებს რეფორმების მიმართულებით გამოცდილება გავუზიაროთ. შეხვედრაზე ყურადღება გავამახვილე საპარლამენტო ზედამხედველობის შესახებ, რაც ორივე ქვეყნისთვის მნიშვნელოვანია“, - განაცხადა სოფიო ქაცარავამ.