პარტია „ერთიანი ნაციონალური მოძრაობა“ აუდიტის სამსახურს თანამდებობის პირების ქონებრივი დეკლარაციების შესწავლას სთხოვს. აღნიშნულის შესახებ განცხადებას პარტიის ერთ-ერთი წევრი ლევან ხაბეიშვილი დღეს შეიტანს.

როგორც ის განმარტავს, გამოძიებული უნდა იყოს, თუ როგორ გადაურიცხა პრემიერ-მინისტრს მისმა მამამ 50 000$, როდესაც მის სახელზე არანაირი შემოსავალი არ ფიქსირდება.

„აუდიტის სამსახურმა გამოიძიოს და დაადგინოს საიდან იშოვა 50 ათასი დოლარი პრემიერ-მინისტრის მამამ, როდესაც მას ოფიციალურად არანაირი ბიზნესი არ გააჩნია, ასევე მისი დეკლარირებული შემოსავალი, რომ რაიმე გაიყიდა და აქედან მიიღო შემოსავალი, არსად არ ჩანს. ამიტომ კითხვა არის მარტივი, საიდან მოვიდა 50 ათასი დოლარი კვირიკაშვილის მამის ხელში, მაშინ როდესაც მის ვაჟს პრემიერ- მინისტრს წელიწადში 51 ათასი ლარი აქვს შემოსავალი,“-განაცხადა ლევან ხაბეიშვილმა.

გასულ წელს გიორგი კვირიკაშვილს მისმა მამამ 50 000 დოლარი გადაურიცხა. აგრეთვე დეპუტატ ნინო წილოსანს მშობელმა 10 000 ლარი აჩუქა.