საქართველოს პარლამენტის თავმჯდომარის ირაკლი კობახიძის განცხადებით, ნატოში და ევროკავშირში გაწევრიანება ეროვნული ინტერესების შესაბამისად წარიმართება.

კობახიძე ამ განცხადებით Heritage Foundation-ის ანგარიშს გამოეხმაურა.

„ნატოში და ევროკავშირში გაწევრიანების პროცესს სტრატეგიულ პარტნიორებთან კონსულტაციების საფუძველზე და ეროვნული ინტერესების შესაბამისად წარვმართავთ“- განაცხადა კობახიძემ.

„ჩვენი მთავარი ამოცანა, საგარეო პოლიტიკური ამოცანა, არის ნატოში გაწევრიანება. ასევე, ევროკავშირში გაწევრიანება. ჩვენ ამ პროცესს წარვმართავთ ჩვენ სტრატეგიულ პარტნიორებთან კონსულტაციების საფუძველზე და ჩვენი ეროვნული ინტერესების შესაბამისად. ეს არის ჩვენი ძალიან მკაფიო პოლიტიკა, რომელსაც ვაწარმოებთ და სწორედ ამ მკაფიო ხედვის საფუძველზე გაგრძელდება ჩვენი პოლიტიკური მუშაობა“,- განაცხადა ირაკლი კობახიძემ.

მისივე თქმით, ხელისუფლების პოლიტიკის წყალობით, ქვეყანაში სტაბილურობის მაღალი დონეა შენარჩუნებულია.

„ქვეყანას აქვს ძალიან მკაფიო ხედვა და ამ მკაფიო ხედვის საფუძველზე, ვახერხებთ მუდმივ წინსვლას და ევროკავშირის მიმართულებით და ასევე, ვახერხებთ ქვეყანაში სტაბილურობის მაღალი დონის შენარჩუნებას. ეს არის ჩვენი საერთო საგარეო პოლიტიკის მთავარი მიღწევა და ამ მიმართულებით გავაგრძელებთ სვლას. ჩვენი პოლიტიკის წყალობით, შეიცვალა ვითარება, რომელიც გვქონდა წინა ხელისუფლების პირობებში, ამას ღიად ვიტყვი და კიდევ ერთხელ გავიმეორებ. ამ პოლიტიკის წყალობით ჩვენ მივაღწიეთ სტაბილურობის ძალიან მაღალ ხარისხს“,- განაცხადა პარლამენტის თავმჯდომარემ.