ქობულეთში მდებარე გასართობ ცენტრ „ციცინათელას“ დირექტორად გურიის გუბერნატორის ყოფილი მოადგილის ლაშა შაფაქიძის დანიშვნა, პრეზიდენტ  მიხეილ სააკაშვილის შიშის მაჩვენებელია. ამის შესახებ კოალიცია „ქართული ოცნების“ ლიდერმა ბიძინა ივანიშვილმა ჟურნალისტებს სასტუმრო „თბილისი მარიოტში“ განუცხადა.
„როდესაც გასართობი ცენტრი აშენდა, გვინდოდა ის ხელისუფლებისთვის გადაგვეცა და ასეც მოხდა. თუმცა, როგორი გასაკვირიც არ უნდა იყოს, „ციცინათელა“ დოტაციურია და თავს ვერ ინახავს. ცენტრს განახლება სჭირდებახოლმე, ამიტომ მას ყოველწლიურად ვეხმარებოდით, მაგრამ ახლა ხელისუფლება და მიხეილ სააკაშვილი არაფერს დაეძებენ, ოღონდაც ივანიშვილი შეაჩერონ. მიხეილ სააკაშვილი ძალიან შეშინებულია" –განაცხადა ბიძინა ივანიშვილმა.
გასართობი ცენტრის, „ციცინათელას“ ახალ ხელმძღვანელად გურიის გუბერნატორის ვალერი ჩიტაიშვილის ყოფილი მოადგილე ლაშა შაფაქიძე ორი დღის წინ დაინიშნა.

„ციცინათელა“ 2007 წელს დაფუძნდა და მისი 100%-იანი წილის მფლობელი სახელმწიფოა. 49-წლიანი მართვის უფლებით იგი „მენეჯმენტ სერვისს” ჰქონდა აღებული, რისთვისაც სახელმწიფოსთვის თვეში 5 000 ლარი უნდა გადაეხადა. „მენეჯმენტ სერვისს” ცენტრი პირობების შეუსრულებლობის გამო ჩამოართვეს.