საქართველოს საგარეო საქმეთა მინისტრის, მიხეილ ჯანელიძის განცხადებით, ის კითხვები, რომლებიც საკომიტეტო მოსმენების ფორმატში დაისვა არაპროფესიონალური და არაკომპეტენტური იყო.
ამის შესახებ საქართველოს ვიცე-პრემიერმა, საგარეო საქმეთა მინისტრმა მიხეილ ჯანელიძემ ოპოზიციის ნაწილის მხრიდან საგარო პოლიტიკის საკითხებზე გამოხატული კრიტიკის საპასუხოდ განაცხადა.
„ეს იყო უნიჭოდ დადგმული სპექტაკლი, არ იყო მზაობა პასუხების მოსმენის, კითხვები იყო არაკომპეტენტური და არაპროფესიონალური. ყველას არ მოეთხოვება იცოდეს დეტალები საერთაშორისო ინსტიტუტების და ორგანიზაციების საქმიანობის შესახებ, მაგრამ იმ ადამიანებს, რომლებიც საქართველოს საგარეო პოლიტიკას ახორციელებდნენ, მათ კარგად უნდა ესმოდეთ, რომ ის კითხები, რომლებიც დასვეს საკომიტეტო მოსმენების და შეხვედრების ფორმატში იყო უადგილო, არაპროფესიონალური და არაკომპეტენტური"- განაცხადა ჯანელიძემ.
მან ასევე აბსურდული უწოდა ოპოზიციის ბრალდებებს საგარეო საქმეთა მინისტრის პარლამენტში არგამოცხადებასთან დაკავშირებით "არასწორია ბრალდება, რომ თითქოს მე არ მივდივარ პარლამენტში და არ ვესწრები დებატებს, მე წელს ორჯერ ვიყავი პარლამენტში მოხსენებით, სადაც ვისაუბრე შედეგებზე და სამომავლო გეგმებზე, და წელს უკვე მესამედ ვარ აქ, სადაც კითხვა პასუხის რეჟიმში მიწევს ინფორმაციის მიწოდება დეპუტატებისთვის. თუმცა უნდა აღინიშნოს, რომ გუშინ იყო მხოლოდ კითხები და პასუხების მოსმენის არანაირი სურვილი არ გამოხატულა ამ პარტიის მხრიდან. მე მინდა განვაცხადო, სანამ არ იქნება მათი მხრიდან სურვილი იყოს რეალური დებატი, რეალური კითხვა-პასუხის რეჟიმი და არა უნიჭოდ დადგმული სპექტაკლები, ასეთ უნიჭოდ დადგმულ სპექტაკლს არანაირი აზრი არ ექნება. მოსახლეობას უნდა ვცეთ პატივი, უნდა ვიდებატოთ, მივაწოდოთ ინფორმაცია. შესაბამისად მათი მხრიდან კითხვის დასმის დროს პასუხის გაცემის საშუალებაც უნდა გვქონდეს და იმედია ეს მომავალში ასე იქნება"- განაცხადა ჯანელიძემ.

მიხეილ ჯანელიძე ასევე გამოეხმაურა გუშინ პარლამენტში მომხდარ ინციდენტს და განაცხადა "ეს იყო დაგეგმილი პროვოკაცია და პროვოკატორების ადგილი საქართველოს პარლამენტში არ უნდა იყოს".