საქართველოსთან ევროკავშირის თანამშრომლობას თან ახლავს ოფიციალური თბილისის ვალდებულება - დაიცვას და გააძლიეროს ქვეყანაში დემოკრატია.

ეს განცხადება ევროპარლამენტის წევრმა, ევროპის ლიბერალებისა და დემოკრატების ალიანსის (ALDE) მომხსენებელმა ნორიკა ნიკოლაიმ გააკეთა.

ALDE-ს ვებ-გვერდზე განთავსებული ინფორმაციის თანახმად, სტრასბურგში, ნორიკა ნიკოლაი და ევროპის ლიბერალებისა და დემოკრატების ალიანსი კოალიცია „ქართული ოცნების“ წარმომადგენლებს თინათინ ხიდაშელს, დავით უსუფაშვილსა და ალექსი პეტრიაშვილს მასპინძლობენ.

ALDE-ს ინფორმაციოთ, ადამიანის უფლებათა დამცველმა წამყვანმა ორგანიზაციებმა შეშფოთება გამოთქვეს საქართველოში განვითარებული მოვლენების გამო, ხოლო შეკრებისა და გაერთიანების თავისუფლების დაცვის საკითხებში გაერო-ს სპეციალურმა მომხსენებელმა ახლახანს მეტად კრიტიკული ანგარიში წარადგინა საქართველოსთან დაკავშირებით.

„მომავალი არჩევნები საქართველოს დემოკრატიის ნამდვილი გამოცდა იქნება. ვიმედოვნებთ, რომ ეს ქვეყანა უფრო ჩამოყალიბებული პოლიტიკური გარემოსა და ძლიერი დემოკრატიის გზით წავა, თუმცა, არის მინიშნებები, რომლებიც შეშფოთების საფუძველს იძლევა“ - განაცხადა ნიკოლაიმ.

მისი თქმით, თავად პრეზიდენტი სააკაშვილი ხელისუფლებაში მშვიდობიანი დემოკრატიული რევოლუციის წყალობით მოვიდა. ასე რომ, მას ამ არჩევნების ჩატარებაზე პასუხისმგებლობა აკისრია.

„ჩვენ დიდი იმედები გვაქვს საქართველოსთან დაკავშირებით. მაგრამ, ევროკავშირმა მკაფიოდ უნდა დაადასტუროს თავისი პოზიცია, რომ თავისუფალი და სამართლიანი არჩევნები სასიცოცხლო მნიშვნელობისაა ევროპასთან დაკავშირებით საქართველოს პერსპექტივისთვის“ - განაცხადა ევროპარლამენტარმა.