საქართველოს საგარეო საქმეთა მინისტრის მოადგილის, დავით ზალკალიანის განცხადებით, ამერიკის შეერთებული შტატების მიერ ჯავშანსაწინააღმდეგო სარაკეტო სისტემის - „ჯაველინის“ საქართველოსთვის გადმოცემა იმ მტკიცე სტრატეგიული პარტნიორობის გამომხატველია, რომელიც განსაკურებით ბოლო წლებში, ამ ორ სახელმწიფოს შორის ჩამოყალიბდა.
მისივე თქმით, „ჯაველინი“ მხოლოდ თავდაცვითი ხასიათის იარაღია და ის შეტევისთვის ვერ გამოიყენება.
„აღნიშნული გადაწყვეტილება ასახავს ორი სუვერნული სახელმწიფოს ნებას და გამომხატველია იმ მტკიცე სტრატეგიული პარტნიორობის, რომელიც განსაკუთრებით ბოლო წლების განმავლობაში, ჩამოყალიბდა ორ სახელმწიფოს შორის, თავდაცვისუნარიანობისა და სტრატეგიული პარტნიორობის განმტკიცების მიმართულებით. ცალსახად და ერთმნიშვნელოვნად უნდა აღინიშნოს, რომ ეს შეიარაღება არის მხოლოდ და მხოლოდ თავდაცვითი, თავდაცვიუნარიანობის გაძლიერებისთვის და არც მისი ტექნიკური მახასიათებლების მიხედვით არ შეიძლება იყოს გამოყენებული შეტევითი მიზნებისთვის“- განაცხადა ზალკალიანმა.
შეგახსენებთ, რომ საქართველო ამერიკის შეერთებული შტატებისგან ჯავშანსაწინააღმდეგო სარაკეტო სისტემას - „ჯაველინის“ ყიდულობს.
საუბარია 410 რაკეტაზე, 72 დანადგარსა და სასწავლო მოდელებზე, რომელთა საერთო ღირებულება 75 მილიონი დოლარია.