რუსეთის ფედერაცია საქართველოში არსებული კონფლიქტების საკითხებთან დაკავშირებით გაეროში დაგეგმილ განხილვებზე ოსური და აფხაზური მხარეების მონაწილეობას ითხოვს.  
ამის შესახებ რუსეთის ფედერაციის საგარეო საქმეთა სამინისტროს განცხადებაშია ნათქვამი.
რუსული მხარის შეფასებით, გაეროს გენერალურ ასამბლეაზე კენჭისყრის შედეგებმა დაადასტურა, რომ „თბილისის მიერ პოლიტიზირებული ინიციატივა, გაეროს წევრ ქვეყნებში ფართო მხარდაჭერით არ სარგებლობს“. ასამბლეაზე ცხინვალის რეგიონისა და აფხაზეთის ტერიტორიაზე დევნილების დაბრუნების საკითხი განიხილებოდა.
„გაეროს წევრი ქვეყნების უმრავლესობამ ან თავი შეიკავა, ან მონაწილეობა არ მიიღო საკითხის განხილვაში. ამით კიდევ ერთხელ დადასტურდა, რომ საქართველო ჰუმანიტარულ საკითხებს პოლიტიკური ინტერესებისთვის იყენებს“ – ნათქვამია განცხადებაში.
ამასთან, ლავროვის უწყების შეფასებით, აღნიშნულ საკითხებზე მსჯელობას გაეროს გენერალურ ასამბლეაზე მხოლოდ მაშინ ექნება აზრი, როდესაც მასში მონაწილეობის უფლებას „აფხაზურ და ოსურ მხარეებს მისცემენ“.
„თბილისის მხრიდან ჯიუტი უარი, რომ სამხრეთ ოსეთთან და აფხაზეთთან „ძალის გამოუყენებლობის შესახებ“ ხელშეკრულება გააფორმოს, კიდევ ერთხელ ადასტურებს, რომ საქართველოს არ სურს მოლაპარაკებათა პროცესში სერიოზულად ჩართვა, რომლის მიზანიც ვითარების მოგვრება იქნება“ – მიაჩნიათ რუსეთის საგარეო საქმეთა სამინისტროში.