თბილისის მერი კახა კალაძე მერიის უსაფრთხოების სამსახურის უფროსის თანამდებობაზე ნუგზარ ჭონქაძის დანიშვნასთან დაკავშირებით „ნაც. მოძრაობის“ კრიტიკას ეხმაურება.

როგორც კალაძე განმარტავს, მისი კანდიდატურის გადახედვის აუცილებლობას ვერ ხედავს და დასძენს, რომ მას კარგი გამოცდილებაც აქვს.

„მინდა წარმატებები ვუსურვო. ძალიან მნიშვნელვანი სამსახურია და დარწმუნებული ვარ, დაკისრებულ მოვალეობას თავს გაართმევს. რატომ უნდა გადავხედო მის კანდიდატურას, რა დააშავა? წლების განმავლობაში მუშაობდა სახელმწიფო უსაფრთხოების სამსახურში, წლების განმავლობაში მუშაობდა ფინანსთა პოლიციაში, წლების განმავლობაში იყო "პროგრეს ბანკის" უსაფრთხოების ხელმძღვანელი. სხვა რომელ წარსულზე მელაპარაკებით? არის ჩოხოსანი, არის კარგი თამადა,“-განაცხადა კახა კალაძემ.

ცნობისთვის, ნუგზარ ჭონქაძე მერიის უსაფრთხოების სამსახურის უფროსის თანამდებობაზე კახა კალაძემ გუშინ წარადგინა. აღნიშნული კი დღეს საკრებულოს „ნაციონალური მოძრაობის“ წევრებმა გააპროტესტეს. მათი თქმით, ჭონქაძე ზონდერია და ჰომოფობიური და ქსენოფობიური განცხადებებით გამოირჩევა.