საქართველოს პრეზიდენტი მიხეილ სააკაშვილი პოლიციას კარგად აწყობილ და ეფექტურ ქართულ სტრუქტურად აფასებს.
როგორც პრეზიდენტმა შს ახალი მინისტრის ბაჩო ახალაიას სამინისტროს თანამშრომლებისთვის წარდგენისას აღნიშნა, მისი ხელმძღვანელის პრემიერ-მინისტრად გადაყვანა ადასტურებს იმას, რომ სამინისტროს წარმატებული ხელმძღვანელობა ჰყავდა.
მისივე განმარტებით, შს მინისტრად ბაჩო ახალაიას წარდგენა ვანო მერაბიშვილთან ერთად მოიფიქრა.
„ვანო ითხოვდა, რომ მისი შემცვლელი ბაჩო ყოფილიყო, რასაც მე მთლიანად ვეთანხმები. ეს გარკვეულ ოჯახურ ინტერსთა კონფლიქტს იწვევს, ამიტომაც, ბაჩოს ძმას სტრუქტურის დატოვება მოუხდა. ეს გარდაუვალია“ – განმარტა სააკაშვილმა.
მისი განცხადებით, საქართველოში კრიმინალი და კორუფცია არასოდეს უნდა დაბრუნდეს, როგორც არ უნდა უნდოდეს ეს არაკეთილმოსურნეებს და ოპონენტებს.
„პოლიცია დეპოლიტიზირებული სტრუქტურაა, ამიტომ, ყველა პოლიტიკური შეხედულების ადამიანს თანასწორად უნდა იცავდეთ. ყველას მიმართ ერთი კრიტერიუმი უნდა იყოს, მაგრამ იმ ხალხის მიმართ გულგრილი ვერ ვიქნებით, ვისაც კორუფციული, კრიმინალური სიტუაციის აღდგენა სურს“ - აღნიშნა პრეზიდენტმა.
მისი თქმით, საქართველოში ნარკომანიის მაჩვენებელი შემცირდა, რომლის დაბრუნება დაუშვებელია.
„ამიტომ, აქ გვჭირდება ძლიერი, მაგრამ ჰუმანური ხელი დემოკრატიული შეხედულებებით. სამინისტროში არის მაღალი კლასის ხელმძღვანელობა. ამათ ძალიან დიდი გაფრთხილება და ხელშეწყობა უნდათ. ვფიქრობ, ახალ მინისტრს ამის პრობლემა არ ექნება“ – განაცხადა მიხეილ სააკაშვილმა.

მისივე განმარტებით, ის რაც საქართველოში პოლიციის და უსაფრთხო ქვეყნის სახით შეიქმნა, ყველა მინისტრზე მაღლა დგას, ამიტომ, მას თვალისჩინივით უნდა მოუფრთხილდნენ.