პარტია „ქართული ოცნება - დემოკრატიული საქართველოს“ ლიდერები ოზურგეთის მერობის კანდიდატის ბეგლარ სიორიძის მხარდასაჭერად, ოზურგეთის მუნიციპალიტეტის სოფელ ძიმითში იმყოფებოდნენ, სადაც ადგილობრივ ამომრჩეველთან შეხვედრა გამართეს.

შეხვედრა ძიმითის კულტურის სახლში გაიმართა, რომელსაც პარტიის გენერალური მდივანი კახა კალაძე, აღმასრულებელი მდივანი ირაკლი კობახიძე და გურიის რეგიონის გუბერნატორი მერაბ ჭანუყვაძე ესწრებოდნენ.

როგორც კალაძემ შეხვედრაზე აღნიშნა, 12 ნოემბერს ოზურგეთში ადგილობრივი თვითმმართველობის არჩევნების მეორე ტური იმართება, რაც ქვეყანაში დემოკრატიული პროცესების ნაწილია.

„მჯერა, რომ თქვენი თანადგომითა და მხარდაჭერით, „ქართული ოცნება - დემოკრატიული საქართველოს“ მიერ წარმოდგენილი კანდიდატი გაიმარჯვებს. ვიცით, რომ ქვეყანაში პრობლემები ჯერ კიდევ არსებობს, რომელთაც დღეს არსებული პოლიტიკური სიტუაციიდან გამომდინარე, ხელისუფლებაში მყოფი გუნდი მოაგვარებს“, - მიმართა კალაძემ ადგილობრივ მოსახლეობას.

„ქართული ოცნების“ გენერალურმა მდივანმა ბეგლარ სიორიძეს წარმატება უსურვა და ადგილობრივ ამომრჩეველს მმართველი გუნდის მხარდაჭერისკენ მოუწოდა.

„ვინც არ უნდა იყოს და რა სიცრუეზეც არ უნდა ააგოს საკუთარი საარჩევნო კამპანია, არავის არაფერი გამოუვა. დღეს ქვეყანაში არ ბნელა და ყველა ყველაფერს ძალიან კარგად ხედავს. მჯერა, რომ სწორ გადაწყვეტილებას მიიღებთ, რომელიც მმართველი გუნდისა და ბეგლარ სიორიძის სასარგებლო იქნება“, - განაცხადა კახა კალაძემ.

ძიმითის კულტურის სახლში შეკრებილ მოსახლეობას სიტყვით თავად მერობის კანდიდატმაც მიმართა და მომავალი ოთხი წლის განმავლობაში, ოზურგეთის მუნიციპალიტეტის მასშტაბით დაგეგმილ ინფრასტრუქტურულ პროექტებზე ისაუბრა.

„გპირდებით, რომ ჩვენს მუნიციპალიტეტში, თქვენთან ერთად, ძალიან ბევრ საინტერესო პროექტს განვახორცილებთ. მომდევნო ოთხი წლის განმავლობაში, თანაგუნდელებთან ერთად, მუხლჩაუხრელად ვიშრომებ იმისთვის, რომ ყველა ის პრობლემა მოვაგაროთ, რომელიც მუნიციპალიტეტის სოფლებში მცხოვრებ მოსახლეობას აწუხებს. მჯერა, რომ ერთად ძალიან ბევრ საინტერესო პროექტს განვახორციელებთ“, - აღნიშნა ბეგლარ სიორიძემ, მოსახლეობას მხარდაჭერისთვის მადლობა გადაუხადა და არჩევნებში მონაწილეობისკენ მოუწოდა.