პარტია „ქართული დასის“ ლიდერის, ოპოზიციონერი დეპუტატის ჯონდი ბაღათურიას განცხადებით, დასაქმების სახელმწიფო მინისტრის პოსტზე დამტკიცებულ პაატა ტრაპაიძეს „ნაციონალური მოძრაობის“ ყულაბაში „ატკატების“ სახით, დიდი ფული შეაქვს.

„ეს არის ადამიანი, რომელიც პარლამენტს აშენებს და ფლიგელი ენგრევა, ხიდი ააშენა ანაკლიაში და ჩამოენგრა. ეს არის „ნაციონალური მოძრაობის“ მოლარე, რომელიც საბიუჯეტო სახსრებით იღებს შეკვეთებს და მერე „ატკატის“ სახით, დიდი ფული შეაქვს პარტიის ყულაბაში“ – აღნიშნა ბაღათურიამ.

მისივე თქმით, დასაქმების სახელმწიფო მინისტრის პოსტზე დამტკიცებული პაატა ტრაპაიძე ზღაპრებიდან სიზმრების მინისტრის პერსონაჟს ახსენებს.

დასაქმების სახელმწიფო სამინისტროს ჩამოყალიბებას და მის ხელმძღვანელად ბიზნესმენ პაატა ტრაპაიძის დანიშვნას პარლამენტმა მხარი უკვე დაუჭირა. ტრაპაიძე კომპანია „კავკასუს როუდ პროჯექტის“ დირექტორი იყო.