სლოვაკეთის რესპუბლიკის კულტურის სამინისტროს საგამოფენო დარბაზში გამოფენის „ქართული ეროვნული სამოსის მრავალფეროვნება“ საზეიმო გახსნა გაიმართა.

მოწვეულ სტუმრებს მისასალმებელი სიტყვით მიმართა სლოვაკეთის რესპუბლიკაში საქართველოს საგანგებო და სრულუფლებიანმა ელჩმა რევაზ გაჩეჩილაძემ, რომელმაც ხაზი გაუსვა ქართული ეროვნული სამოსის უნიკალურობასა და მის მნიშვნელობას ქართველი ხალხისთვის.

გამოფენაზე წარმოდგენილი იყო XIII-XX სს. ქართული ეროვნული სამოსის ამსახველი ფოტომასალა, ქართული კოსტიუმები და აქსესუარები.

საგარეო საქმეთა სამინისტროს ინფორმაციით, ღონისძიებას ესწრებოდნენ სლოვაკეთის რესპუბლიკის საკანონმდებლო და აღმასრულებელი ხელისუფლების წარმომადგენლები, სლოვაკეთში აკრედიტებული დიპლომატიური მისიების უმრავლესობის ხელმძღვანელები, საერთაშორისო და არასამთავრობო ორგანიზაციების წარმომადგენლები, ხელოვნების მუშაკები.

საღამო მოეწყო სლოვაკეთის რესპუბლიკაში საქართველოს საელჩოს ორგანიზებითა და საქართველოს საპატიო კონსულის - ნოდარ გიორგაძის მხარდაჭერით. მსურველებს შესაძლებლობა აქვთ იხილონ ექსპოზიცია ა.წ. 30 ოქტომბრამდე.