კახა კალაძე მოქალაქეებს, მათ შორის ოპონენტებს თანამშრომლობას სთავაზობს.
ამასთან დაკავშირებით „ქართული ოცნების“ თბილისის მერობის კანდიდატმა ბრიფინგზე ისაუბრა.
„მერიის კარი ღია იქნება თბილისის თითოეული გულშემატკივრისთვის, ნებისმიერი კონსტრუქციული ძალისთვის და თუნდაც ჩემი ყოფილი კონკურენტებისთვის, რომელთაც კონკრეტული რეალისტური იდეები აქვთ და სურთ საკუთარი წვლილი შეიტანონ ჩვენი დედაქალაქის უკეთესი მომავლის მშენებლობაში. მე ამაზე ვისაუბრე და კიდევ ერთხელ გავიმეორებ, რომ მართლაც, თუ მათ გააჩნიათ კონკრეტული ხედვები, იდეები, კონკრეტული პროექტები თბილისთან დაკავშირებით, კიდევ ერთხელ გულწრფელად ვამბობ, რომ მზად ვარ თანამშრომლობისთვის“ - აღნიშნა კახა კალაძემ.
თბილისის მერობის კანდიდატმა კიდევ ერთხელ მადლობა გადაუხადა მხარდამჭერებს და აღნიშნა, რომ არჩევნებში თბილისმა გაიმარჯვა.
„მინდა დიდი მადლობა გადაგიხადოთ გამოცხადებული მხარდაჭერისთვის და მოგილოცოთ ეს დამაჯერებელი გამარჯვება. ჩემთვის დიდი პასუხისმგებლობა და დიდი პატივია ვიყო ჩვენი ქვეყნის დედაქალაქის მერი. თქვენი მხრიდან გამოცხადებული მხარდაჭერა კი მიორმაგებს პასუხისმგებლობას და მაძლევს სტიმულს, თავდაუზოგავად ვიმუშაო ჩვენი ქალაქის, თითოეული თბილისელის წინაშე მდგარი გამოწვევების დაძლევისთვის. ჩატარებული სამართლიანი და დემოკრატიული არჩევნებით საქართველომ კიდევ ერთხელ დააადასტურა, რომ არის დემოკრატიული სამყაროს, ევროპული ოჯახის ღირსეული წევრი. მინდა ყველამ იცოდეს, რომ არჩევნებში არავინ დამარცხებულა. ამ არჩევნებში გაიმარჯვა ქართველმა ხალხმა, გაიმარჯვა თბილისმა და თითოეულმა თბილისელმა“, - განაცხადა კახა კალაძემ და მისი საარჩევნო პროგრამის შესახებ საზოგადოების ინფორმირებისთვის მადლობა, ასევე, მედიას გადაუხადა.
როგორც „ქართული ოცნების“ თბილისის მერობის კანდიდატმა აღნიშნა, მალე თბილისი მის მიერ დეკლარირებული პროექტების განხორციელების შედეგს იგრძნობს.
ჩვენ პირველივე დღიდან აქტიურად შევუდგებით თბილისში არსებული პრობლემების მოგვარებას და ჩვენ მიერ დეკლარირებული პროგრამის განხორციელებას. ჩვენი მუშაობის პოზიტიურ შედეგს ძალიან მალე შეიგრძნობს თითოეული თბილისელი და დარწმუნებული ვარ ჩვენი საყვარელი ქალაქი მალე გადავა განვითარების სრულიად ახალ ეტაპზე. ჩვენ ერთმანეთის გვერდში დგომით, ერთმანეთის მხარდაჭერით და ჩვენი ქალაქის სიყვარულით წინ კიდევ ბევრი გამარჯვება გველის. ჩვენ ყოველდღიურად უნდა გავიმარჯვოთ თბილისის და თბილისელების პრობლემებზე. დარწმუნებული ვარ, ეს ასეც იქნება და თბილისი აუცილებლად იქნება კიდევ უფრო სოლიდარული, ჯანსაღი, სიცოცხლით სავსე ქალაქი“ - განაცხადა კახა კალაძემ.
ცენტრალური საარჩევნო კომისიის პირველადი მონაცემების თანახმად, თბილისის მერის არჩევნებში კახა კალაძემ გამარჯვება პირველივე ტურში მოიპოვა.