ცენტრალური საარჩევნო კომისიის თავმჯდომარის, თამარ ჟვანიას განცხადებით, მიმდინარე წლის 21 ოქტომრის არჩევნებზე ამომრჩეველთა აქტივობამ წინასწარი მონაცემებით 45.65% შეადგინა.
მისივე თქმით, კენჭისყრაში მონაწილეობა 789 ათას 612 ქალმა და 780 ათას 911-მა კაცმა მიიღო.

„21 ოქტომბერს ამომრჩეველმა არჩევანი გააკეთა 64 საკრებულოს 2 258 წევრის და 64 მერის ასარჩევად. ამომრჩეველთა აქტივობამ წინასწარი მონაცემებით 45.65 % შეადგინა, რაც შეეხება გენდერულ სტატისტიკას, წინასწარი მონაცემებით კენჭისყრაში მონაწილეობა მიიღო 789 ათას 612 ქალმა და 780 ათას 911-მა კაცმა. ხმების დათვლის პროცესმა საარჩევნო უბნებზე ჩაიარა კანონის შესაბამისად. კიდევ ერთხელ აღვნიშნავთ, რომ არჩევნების დღეს საარჩევნო უბნებზე ძირითადად მშვიდ გარემოში ჩაიარა პროცესებმა, გარდა ცალკეული პროცედურული დარღვევებისა, რაზეც ცხადია საარჩევნო ადმინისტრაციას ექნება შესაბამისი რეაგირება. საერთო ჯამში ყველა საოლქო საარჩევნო კომისიაში ამ დროისთვის შესულია 309 საჩივარი, ყველაზე მეტი შევიდა მარნეულში, ვაკეში, ნაძალადევსა და ქუთაისში“ - განაცხადა თამარ ჟვანიამ.