საქართველოს შინაგან საქმეთა მინისტრმა, გიორგი მღებრიშვილმა საკუთარი არჩევანი დიდუბეში მე-8 ოლქის 26-ე უბანზე დააფიქსირა.
ის ხმის მისაცემად მამასთან ერთად გამოცხადდა.
როგორც მღებრიშვილმა ხმის მიცემის შემდეგ განაცხადა, კანონის შესაბამისად პოლიციელები ყველა საარჩევნო უბანზე არიან განაწილებულები.
მისივე თქმით, ჯერ-ჯერობით არცერთ ოლქში პოლიციის ჩარევა საჭირო არ გამხდარა.
„ჩვენი მხრიდან იქნება გაკეთებული მაქსიმუმი იმისთვის, რომ ყველას ხმა იყოს დაცული, მაღალი ევროპული, დასავლური სტანდარტის შესაბამისად. ჩვენ ყველა უბანზე გვყავს განაწილებული პოლიციელები, იმ დისტანციაზე, რასაც კანონი უშვებს და მაქსიმუმს გავაკეთებთ იმისთვის, რომ არ მოხდეს არანაირი კონფლიქტი და თავიდან იქნეს აცილებული ყველანაირი სამართალდარღვევა. ამ წუთამდე, პოლიციის ჩარევა არსად საჭირო არ გამხდარა, რაც მახარებს, და იმედს ვიტოვებ, რომ ისე ჩაივლის ეს არჩევნები, რომ პოლიციის ჩარევა არც ერთ უბანზე საჭირო არ გახდება“ - განაცხადა გიორგი მღებრიშვილმა.
მღებრიშვილმა ახალციხეში მაჟორიტარ კანდიდატზე ფიზიკურ ზეწოლასთან დაკავშირებით მედიაში გავრცელებული ინფორმაცია უარყო.
„არაფერი მსგავსი არ მომხდარა. კიდევ ერთხელ გიმეორებთ, არანაირ თავდასხმასა და ძალადობას ადგილი არ ქონია“- განაცხადა მღებრიშვილმა.