ბათუმში გამართული თავდაცვისა და უსაფრთხოების კონფერენციის ფარგლებში საქართველოს საგარეო საქმეთა მინისტრის პირველმა მოადგილემ დავით ზალკალიანმა შეხვედრა გამართა რეგიონულ საკითხებში რუმინეთის საგარეო საქმეთა სამინისტროს სახელმწიფო მდივანთან დანუც-სებასტიან ნეკულაესკუსთან.

შეხვედრისას მხარეებმა განიხილეს ორ ქვეყანას შორის არსებული სტრატეგიული თანამშრომლობის შესაძლებლობების მაქსიმალურად გამოყენება პოლიტიკური უსაფრთხოების, ეკონომიკური და ხალხთაშორისი კავშირების გაღრმავების კუთხით.

საგარეო საქმეთა სამინისტროს ინფორმაციით, დანუც-სებასტიან ნეკულაესკუმ კიდევ ერთხელ დაადასტურა რუმინეთის მტკიცე მხარდაჭერა საქართველოს სუვერენიტეტისა და ტერიტორიული მთლიანობის, ასევე ქვეყნის ევროკავშირში ინტეგრაციის მიმართ.

შეხვედრისას მხარეებმა აგრეთვე განიხილეს საერთაშორისო ორგანიზაციების ფარგლებში თანამშრომლობის გაღრმავების შესაძლებლობები.

მხარეები შეთანხმდნენ საერთო საფრთხეებისა და გამოწვევების შესახებ ინფორმაციის რეგულარული გაცვლის თაობაზე.