ექსპერტი სოსო ცინცაძე განათლებისა და მეცნიერების ყოფილი მინისტრის, დიმიტრი შაშკინის წარდგენას თავდაცვის მინისტრის პოსტზე დადებითად აფასებს.
როგორც „ნიუსპრესს“ ცინცაძემ განუცხადა, შაშკინი დაბადებით და პროფესიით რეფორმატორია, შესაბამისად, მას ყველა მონაცემი აქვს, რათა მასზე დაკისრებულ მოვალეობებს თავი გაართვას.
„შაშკინმა უნდა დაასრულოს და ბოლო აკორდი დაუვას იმ რეფორმებს, რომელიც თავდაცვის უწყებაში ახალაიამ დაიწყო“ - განაცხადა ცინცაძემ.
ექსპერტი განათლების ყოფილი მინისტრის საქმიანობას ამ და მანამდე დაკავებულ პოსტებზე, დადებითად აფასებს. მისი თქმით, ყველა უწყებაში, სადაც შაშკინი მუშაობდა, საქმეს თავიდან იწყებდა, თუმცა, ზოგიერთ შემთხვევაში, მას ამ საქმის ბოლომდე მიყვანა არ დასცალდა.
„რეფორმატორების ტრაგედია ისაა, რომ მათ ზოგჯერ თავისი დაწყებული საქმის ბოლომდე მიყვანას არ აცლიან“ - აღნიშნა მან.
ასევე, ცინაცაძეს მოსწონს პრეზიდენტის გადაწყვეტილება პრემიერ-მინისტრის თანამდებობაზე შინაგან საქმეთა უწყების ყოფილი ხელმძღვანელის ვანო მერაბიშვილის წარდგენის შესახებ. ექსპერტი მიიჩნევს, რომ მერაბიშვილი ძლიერი პოლიტიკოსი, კარგი მენეჯერი და მეურნეა.
ცინცაძემ წინა პრემიერებზეც ისაუბრა და აღნიშნა, რომ ზურაბ ჟვანიას გარდაცვალებიდან დღემდე, საქართველოს ძლიერი პრემიერ-მინისტრი არ ჰყოლია. მისივე თქმით, ამ მხრივ გამონაკლისი არც ყოფილი პრემიერი ნიკა გილაური იყო.
„გილაურის სასარგებლოდ უნდა ითქვას, რომ როდესაც პრეზიდენტი მისი გადაყენების შესახებ აცხადებდა, ისეთი ბედნიერი სახე ჰქონდა, მგონი, იმ საღამოს რესტორანში სუფრა გაშალა, ეს რა ჭირს გადავურჩიო“- იხუმრა მან.
ექსპერტმა დასაქმების სამინისტროს შექმნის გადაწყვეტილებაც შეაფასა და აღნიშნა, რომ ეს მერაბიშვილის მხრიდან დიდი რისკია.
„როგორ ააწყობს ამ სამინისტროს, ეს მერაბიშვილისთვის ტესტი იქნება“-აღნიშნა მან.