პარტია „ახალი მემარჯვენეების“ ლიდერი დავით გამყრელიძე მიიჩნევს, რომ ხელისუფლება ბაჩო ახალაიას შინაგან საქმეთა მინისტრად დანიშვნით, აღნიშნულ უწყებას ძალისმიერი ფუნქციებით დატვირთავს.
„ბაჩო ახალიას შს მინისტრად დანიშვნა ნიშნავს იმას, რომ ხელისუფლება შსს-ს ძალისმიერი მიმართულებით დატვირთავს. ახალაია ყველასთვის ცნობილია იმ ძალადობებითა და აგრესიულობით, რომლითაც ბოლო წლებში დაგვამახსოვრა თავი. აქედან გამომდინარე, ნეგატიურად ვაფასებ მის კანდიდატურას შს მინისტრის თანამდებობაზე“- განუცხადა „ნიუსპრესს“ გამყრელიძემ.
მისივე თქმით, რაც შეეხება განათლებისა და მეცნიერების ყოფილ მინისტრს დიმიტრი შაშკინს, მას დისციპლინის სიყვარული თავდაცვის სფეროში უფრო გამოადგება.
„შაშკინი დისციპლინის მოყვარული იყო და განათლების სფეროზე უფრო, დისციპლინა თავდაცვაში ნამდვილად გამოადგება. ვნახოთ, როგორი თავდაცვის მინისტრი იქნება, მაგრამ მგონია, რომ იგი მარტო არ იქნება. აუცილებლად, მასთან ერთად სააკაშვილისთვის სანდო სხვა ადამიანებსაც დანიშავენ, რათა კონტროლი კიდევ უფრო მეტი იყოს ამ უწყებაზე“- აღნიშნა გამყრელიძემ.
სამთავრობო ცვლილებების მიხედვით, შინაგან საქმეთა მინისტრად თავდაცვის ყოფილი მინისტრი ბაჩო ახალაია დაინიშნა, თავდაცვის მინისტრის პოსტზე განათლებისა და მეცნიერების მინისტრი დიმიტრი შაშკინი, განათლების მინისტრად ეროვნული გამოცდების ცენტრის ხელმძღვანელი ხატია დეკანოიძე, ხოლო ოკუპირებულ ტერიტორიებიდან იძულებით გადადგილებულ პირთა, განსახლებისა და ლტოლვილთა მინისტრად აფხაზეთის მთავრობის განათლების მინისტრი დალი ხომერიკი.