საქართველოს ვიცე პრემიერმა, საგარეო საქმეთა მინისტრმა მიხეილ ჯანელიძემ ევროკავშირის საბჭოს პოლიტიკური და უსაფრთხოების კომიტეტის ელჩებთან შეხვედრა შეაჯამა და საქართველო ევროკავშირის თანამშრომლობის კუთხით ვიზიტის მნიშვნელობას ხაზი გაუსვა.

ჯანელიძის განცხადებით, საქართველო უახლოვდება ყველა იმ ინსტიტუტს, რომელიც უზრუნველყოფს ევროპის უსაფრთხოებას და ევროპის სტაბილურობას.

„ევროკავშირი საქართველოს განიხილავს, როგორც მთავარ პარტნიორს და ჩვენ გვაქვს მჭიდრო არა მხოლოდ პოლიტიკური ასოცირების პროცესი და ეკონომიკური ინტეგრაციის, არამედ უსაფრთხოების სფეროში ძალიან მჭიდრო თანამშრომლობა. ეს არის ის მიმართულება, რომელზეც ჩვენ აქტიურად ვმუშაობთ. ჩვენ ვუახლოვდებით ყველა იმ ინსტიტუტს, რომელიც უზრუნველყოფს ევროპის უსაფრთხოებას და ევროპის სტაბილურობას, საქართველოს განვითარებას. საქართველოს ევროპული ტრანსფორმაცია და ის წარმატებული რეფორმები, რომელიც ჩვენს ქვეყანაში ხორცილდება არის ერთიანი, უსაფრთხო, სტაბილური ევროპის ძალიან მნიშვნელოვანი შემადგენელი კომპონენტი, ისევე როგორც ძალიან მნიშვნელოვანი ამ რეგიონისთვის“- განაცხადა ჯანელიძემ.

როგორც მინისტრმა აღნიშნა, შეხვედრაზე ყურადღება გამახვილდა საქართველოში არსებულ გამოწვევებზე, ოკუპირებულ ტერიტორიებზე არსებულ ვითარებასა და ადამიანის უფლებების მხრივ არსებულ რთულ მდგომარეობაზე. ხაზი გაესვა ევროკავშირის მნიშვნელოვან როლს კონფლიქტის მშვიდობიანი მოგვარების პროცესში, მათშორის განსაკუთრებით აღინიშნა ევროკავშირის მონიტორინგის მისიის საქმიანობა, ასევე ევროკავშირის ჩართულობა ჟენევის მოლაპარაკებების პროცესში, ასევეხალხთაშორისი ურთიერთობების აღდგენისა და ომით დაშორიშორებულ მოსახელობას შორის ნდობის აღდგენის მიმართულებით.

მინისტრმა ისაუბრა კომიტეტის მხრიდან აქტიური ჩართულობისა და მხარდაჭერის შესახებ საქართველოსთან მიმართებაში და აღნიშნა რომ ეს თანამშრომლობა მომავალ შიკიდევ უფრო აქტიურ და მჭიდრო ხასიათს მიიღებს.
„ჩვენ დღეს კიდევ ერთხელ მივიღეთ სრული მხარდაჭერა და დადასტურება , რომ საქართველო-ევროკავშირის თანამშრომლობა ყველა მიმართულებით, პოლიტიკური, ეკონომიკური, უსაფრთხოების სფეროში თანამშრომლობის კუთხით გაგრძელდება აქტიურად და გაღრმავდება“- განაცხადა ჯანელიძემ.

ვიზიტის ფარგლებში PSC-ის ელჩები ასევე შეხვედრებს გამართავენ საქართველოს პრეზიდენტთან, საქართველოს პრემიერ-მინისტრთან, შერიგებისა და სამოქალაქოთანასწორობის საკითხებში სახელმწიფო მინისტრთან, საქართველოს თავდაცვის მინისტრთან, საქართველოს პარლამენტის თავმჯდომარის პირველ მოადგილესთან, ამასთანვე დაგეგმილია შეხვედრა სამოქალაქო საზოგადოების წარმომადგენლებთან.