თბილისის საკრებულოში პუშკინის სკვერის მიმდებარედ 1 900 კვ.მეტრი მიწის ნაკვეთისთვის ზონალურ ცვლილებასთან დაკავშირებული საკითხის განხილვა მიმდინარეობს.

როგორც „ერთიანი ნაციონალური“ მოძრაობის მერობის კანდიდატმა ზალიკო უდუმაშვილმა სხდომაზე განაცხადა, ცვლილებას ტერიტორიის მისაკუთრებაც მოყვება და თაბორის მთა ზვიგენარიუმად გადაიქცევა.

„თაბორის მთაზე ზონის ცვლილებას ავტომატურად შემდეგ მოჰყვება ამ ტერიტორიის მითვისებაც. 40 ჰექტარი უკვე აქვს თაბორის მთაზე ბიძინა ივანიშვილს დაკანონებული და კიდევ ახალ ტერიტორიას აძლევთ. დღეს თაბორის მთა გადაიქცა ზვიგენარიუმის თუ მავზოლეუმის მშენებლობად. ზვიგენარიუმი კეთდება ჩვეულებრივი. სამი კვირა გაქვთ დარჩენილი ასეთი გადაწყვეტილებების მისაღებად. სამი კვირის მერე ამ ქალაქს აუცილებლად ეყოლება პატრონი, რომელიც სულ სხვა გადაწყვეტილებებს მიიღებს,“ - მიმართა სხდომის წევრებს ზაალ უდუმაშვილმა.
როგორც სხდომაზე აღინიშნა, ამჟამად ამ ნაკვეთზე ღია ავტოსადგომია და ბიძინა ივანიშვილის მფლობელობაში არსებული კომპანია ითხოვს ერთ ლარად გადაეცეს აღნიშნული ფართობი, რის სანაცვლოდაც ადგილზე 1 მილიონი ლარის ინვენსტიციას განახორციელებს და რამდენიმედონიანი მიწისქვეშა პარკინგი მოეწყობა.