საქართველოს პარლამენტის თავმჯდომარის, ირაკლი კობახიძის განცხადებით, ახალი კონსტიტუციით ისეთ სისტემას ეყრება საფუძველი, რომელიც საქართველოს გრძელვადიან დემოკრატიულ განვითარებას უზრუნველყოფს.


ამის შესახებ საქართველოს პარლამენტის თავმჯდომარემ დღეს, პარლამენტის რიგგარეშე სხდომაზე, კენჭისყრის პროცედურის დასრულების შემდეგ განაცხადა.

„ჩვენ დღეს მივიღეთ ნამდვილად ისტორიული გადაწყვეტილება, რომლის საფუძველზეც ძალიან მყარი საფუძველი ეყრება ისეთ სახელმწიფო სისტემას, რომელიც უზრუნველყოფს ჩვენი ქვეყნის გრძელვადიან დემოკრატიულ განვითარებას“- განაცხადა კობახიძემ.


ირაკლი კობახიძემ ისტორიული დოკუმენტის მხარდაჭერისთვის განსაკუთრებული მადლობა კოლეგებს - საქართველოს პარლამენტის წევრებს გადაუხადა.

„კოლეგებო, პარლამენტის წევრებო, ძვირფასო სტუმრები, კიდევ ერთხელ მინდა, მადლობა გადაგიხადოთ. პარლამენტის წევრებს მინდა, განსაკუთრებული მადლობა გადავუხადო ამ ისტორიული დოკუმენტის მხარდაჭერისთვის. ჩვენ დღეს მივიღეთ ნამდვილად ისტორიული გადაწყვეტილება, რომლის საფუძველზეც ძალიან მყარი საფუძველი ეყრება ისეთ სახელმწიფო სისტემას, რომელიც უზრუნველყოფს ჩვენი ქვეყნის გრძელვადიან დემოკრატიულ განვითარებას. დიდი მადლობა ერთსულოვნებისთვის, დიდი მადლობა მხარდაჭერისთვის“,- განაცხადა პარლამენტის თავმჯდომარემ.

საქართველოს პარლამენტმა კონსტიტუციური კანონის პროექტი „საქართველოს კონსტიტუციაში ცვლილების შეტანის შესახებ“, მესამე მოსმენით, 117 ხმით მიიღო. 114-მა დეპუტატმა დაუჭირა მხარი კონსტიტუციურ კანონის პროექტს „აჭარის ავტონომიური რესპუბლიკის შესახებ“.