გერმანია-საქართველო-გერმანიის წლის ფარგლებში ბრემენის მერიის ისტორიულ დარბაზში კონფერენცია „25 წელი ქართულ-გერმანული სამართლებრივი დიალოგი“ გაიმართა, რომელიც სამართლის სფეროში ქართულ-გერმანული თანამშრომლობის 25 წლის იუბილეს მიეძღვნა.
საგარეო საქმეთა სამინისტროს პრესსამსახურის ინფორმაციით, კონფერენციის მონაწილეებს მისასალმებელი სიტყვით გერმანიის ფედერაციულ რესპუბლიკაში საქართველოს ელჩმა, ლადო ჭანტურიამ მიმართა, რომელმაც თავის გამოსვლაში სამართლის სფეროში ხანგრძლივ ქართულ-გერმანულ თანამშრომლობასა და დამოუკიდებლობის მოპოვების შემდეგ საქართველოში ახალი სამართლის სისტემის ჩამოყალიბებაში გერმანული სამართლისა და გერმანელი, განსაკუთრებით ბრემენელი იურისტების როლზე ისაუბრა.
უწყების ინფორმაციითვე, მოხსენებაში საქართველოს ელჩმა საქართველო-გერმანიის წელზეც გაამახვილა ყურადღება.
ასევე, საიუბილეო კონფერენციაზე მოხსენებით გამოვიდა საქართველოს უზენაესი სასამართლოს თავმჯდომარე, ნინო გვენეტაძე, რომელმაც სასამართლო რეფორმის სფეროში ქართულ-გერმანულ თანამშრომლობასა და მიმდინარე ერთობლივ პროექტებზე ისაუბრა.
“საქართველოს სახელმწიფოებრივი დამოუკიდებლობის მოპოვებისთანავე გერმანია პირველი სახელმწიფო იყო, რომელმაც გასული საუკუნის 90-იანი წლების დასაწყისში სამართლებრივი რეფორმის სფეროში საქართველოს დიდი დახმარება აღმოუჩინა. ამ თანამშრომლობის ფარგლებში შემუშავდა და მიღებულ იქნა სამოქალაქო კოდექსი, სამოქალაქო საპროცესო კოდექსი, სამეწარმეო კანონმდებლობა, ზოგადი ადმინისტრაციული და ადმინისტრაციული საპროცესო კოდექსები, განხორციელდა სასამართლო რეფორმა, ქართველმა მოსამართლეებმა პრაქტიკა გაიარეს გერმანულ სასამართლოებში.
ქართულ-გერმანული სამართლებრივი თანამშრომლობის ფარგლებში მრავალმა ქართველმა იურისტმა მიიღო იურიდიული განათლება გერმანიაში. ამ თანამშრომლობას ხელმძღვანელობდა ბრემენის ფედერალური მიწა. ამიტომ სიმბოლურია, რომ წარმატებული თანამშრომლობის იუბილე სწორედ ბრემენში აღინიშნა და მასში მონაწილეობა მიიღეს ბრემენელმა იურისტებმა და პოლიტიკოსებმა.
საქართველოს უზენაესი სასამართლოს თავმჯდომარე და საქართველოს ელჩი გერმანიაში ბრემენის ფედერალური მიწის პრემიერ-მინისტრს კარსტენ ზილიგსაც შეხვდნენ“-განმარტავენ საგარეო უწყებაში.