შიდა ქართლში, სოფელ ერედვში სახლების ნგრევის პროცესს დევნილთა მინისტრი სოზარ სუბარი გამოეხმაურა.
როგორც მინისტრმა აღნიშნა, პირები, რომლებიც მსგავს პროცესებში მონაწილეობენ, აუცილებლად დაისჯებიან.
„ტერიტორიები, რომლებიც ოკუპირებულია, დაბრუნდება. ეს პრაქტიკულად გენოციდის გაგრძელებაა და ისინი აუცილებლად აგებენ პასუხს. ეს დღე აუცილებლად დადგება. მთავარია, რომ ჩვენ ამასობაში შევინარჩუნოთ ქვეყნის სწორი, სტრატეგიული განვითარების კურსი. ეს გულისხმობს საქართველოს ინტეგრაციას ევროპულ და ევროატლანტიკურ სივრცეში; ეს გულისხმობს სწორი პოლიტიკის გატარებას ოკუპირებულ ტერიტორიებზე მცხოვრები ჩვენი თანამოქალაქეების მიმართ, რომლებიც დღეს შეიძლება სხვანაირად ფიქრობენ, მაგრამ ისინი აუცილებლად დაინახავენ, რომ მათი მომავალი სწორედ საქართველოშია და სწორდ ქართულ სახელმწიფოში აქვთ გარანტირებული უკეთესი მომავალი. ჩვენ სწორად უნდა განვავითაროთ საქართველოს ეკონომიკა და სიძლიერე დემოკრატიული ინსტიტუტის ჩამოყალიბებაში“-განაცხადა მინისტრმა.
ცნობისთვის, სოფელ ერედვში, რუსეთის ფედერალური ბიუჯეტის დაფინანსებითა და სამშენებლო კომპანია ,,შანსის" ტექნიკით, საცხოვრებელი სახლების კედლებს ანგრევენ და მიწას საძირკვლისგან ასუფთავებენ.
ამის შესახებ ინფორმაცია ცხინვალის ტელევიზიამ გაავრცელა.
ადგილობრივი მედიის ცნობით, კომპანიამ წლის ბოლომდე სოფელი ერედვი ყველანაირი კონსტრუქციისგან უნდა გაწმინდოს. დე-ფაქტო სამხრეთ ოსეთის მშენებლობის მართვის სამსახურის უფროსის, ვალერი კოკოევის თქმით, გათვალისწინებულია სოფელ ერედვის გაწმენდა 268 სახლისგან.