საქართველოს საგარეო საქმეთა მინისტრის მოადგილემ, დავით ჯალაღანიამ გაცნობითი შეხვედრა გამართა საქართველოში იაპონიის საგანგებო და სრულუფლებიან ელჩთან, ტადაჰარუ უეჰარასთან.
დავით ჯალაღანია მიესალმა საქართველოში იაპონიის საგანგებო და სრულუფლებიანი ელჩის მისიის დაწყებას და მასთან აქტიური თანამშრომლობის მზადყოფნა გამოთქვა. საგარეო საქმეთა სამინისტროს პრესსამსახურის ინფორმაციით, მხარეებმა კმაყოფილებით აღნიშნეს, 2017 წლის განმავლობაში განხორციელებული ორმხრივი ვიზიტების მაღალი დინამიკა, ასევე საერთაშორისო ფორმატებში ორ ქვეყანას შორის გააქტიურებული მაღალი დონის ინტერაქცია. აღინიშნა, როგორც ორმხრივ ასევე მრავალმხრივ ფორმატებში საქართველოს და იაპონიას შორის არსებული სრული ურთიერთმხარდაჭერა და აზრთა თანხვედრა.
ხაზი გაესვა იაპონიასთან სავაჭრო-ეკონომიკური კავშირების გაზრდის მაღალ მნიშვნელობას და ამ მიმართულებით არსებულ შესაძლებლობებს. განხილულ იქნა აღნიშნულ სფეროში თანამშრომლობის პერსპექტივები, მათ შორის საქართველოს მთავრობის მიერ ეკონომიკური განვითარების ხელშეწყობის მიზნით შემუშავებული 4 პუნქტიანი გეგმის განხორციელების პროცესში იაპონიის შესაძლო მონაწილეობა.
შეხვედრაზე საუბარი აგრეთვე შეეხო საქართველოს და იაპონიას შორის კულტურის სფეროში არსებულ ხანგრძლივ და ნაყოფიერ თანამშრომლობას, რაც ორი ერის მრავალწლიან მეგობრობაზე მეტყველებს. ყურადღება ასევე გამახვილდა განათლების და მეცნიერების სფეროში ურთიერთობების ხელშეწყობის ორმხრივ მზადყოფნაზე.