საქართველოში ევროკავშირის ელჩის იანოშ ჰერმანის განცხადებით, იტალიელი ჟურნალისტისა და საზოგადო მოღვაწის ჯულიეტო კიეზას განცხადებას არანაირი ეფექტის მოხდენა არ შეუძლია.
მისივე თქმით, ევროკავშირის საპარლამეტო კომიტეტების სესიაზე საკმაოდ მკაფიოდ დაფიქსირდა ევროკავშირის პოზიცია, რაც სუვერენიტეტისა და ტერიტორიული მთლიანობის საკითხებში სრულ საქართველოს მხარდაჭერას ითვალისწინებს.

ამის შესახებ ჰერმანმა ევროპარლამენტის ყოფილი წევრის ჯულიეტო კიეზას განცხადების საპასუხოდ აღნიშნა.
„მინდა გამოვეხმაურო ბატონი კიეზას. მან მსგავსი კომენტარები გააკეთა წინა წლებშიც და სავარაუდოდ, იმავეს იტყვის მომავალშიც, თუმცა მის სიტყვებს არანაირი ეფექტის მოხდენა არ შეუძლია და არ ვფიქრობ, რომ მის განცხადებებს დიდი ყურადღება უნდა დავუთმოთ. ევროპარლამენტის დღის წესრიგს ევროპარლამენტის წევრები ადგენენ და მინდა შევახსენო, რომ გუშინ საქართველოსა და ევროკავშირის საპარლამეტო კომიტეტების სესიაზე საკმაოდ მკაფიოდ დაფიქსირდა ევროკავშირის პოზიცია, რაც ითვალისწინებს საქართველოს სრულ მხარდაჭერას სუვერენიტეტისა და ტერიტორიული მთლიანობის საკითხებში და ამას ვერანაირი განცხადებები ვერ შეცვლის“- განაცხადა ჰერმანმა.
შეგახსენებთ, რომ კიეზას განცხადებით, ის ევროპაში სამხრეთ ოსეთის პოზიციის დაცვას გააგრძელებს.
„მე გავაგრძელებ თქვენი პოზიციის დაცვას ევროპაში. მილიონობით ევროპელმა სამხრეთ ოსეთის შესახებ სიმართლე უნდა გაიგოს. ერთ საგაზეთო სტატიას ან ტელეგადაცემას შეიძლება ძალიან დიდი ეფექტი ჰქონდეს”, - განაცხადა ჯულიეტო კიეზამ.

”ოსეთის რესპუბლიკას” ევროპარლემნტში საკუთარი წარმომადგენელი ეყოლება. დე-ფაქტო პარლამენტის ე.წ. სპიკერის, პეტრ გასიევის თქმით, ”ოსეთის რესპუბლიკის” ინტერესებს ევროპარლამენტში იტალიელი ჟურნალისტი და საზოგადო მოღვაწე, ევროპარლამენტის ექს-დეპუტატი ჯულიეტო კიეზა დაიცავს.