პარლამენტის თავმჯდომარემ, დავით ბაქრაძემ დაბა ჩოხატაურში სტუმრობისას შეკრებილ მოსახლეობას მოთმინებისთვის მადლობა გადაუხადა.
"თქვენ რომ ასე მოთმინებით არ იყოთ, ასე გამძლეობით არ იყოთ, ჩვენთან ერთად არ იდგეთ და არ გვაცლიდეთ რომ ვიმუშაოთ, არაფერი არ გაკეთდებოდა" - აღნიშნა დავით ბაქრაძემ მოსახლეობასთან საუბრისას.
მან ასევე საბერძნეთის მაგალითი ახსენა და განმარტა, რომ მათმა მოუთმენლობამ ქვეყანა მძიმე შედეგებამდე მიიყვანა.
"ხედავთ აგერ საბერძნეთში რა ხდება, ხალხი ქუჩებშია გამოსული ამტვრევს და ლეწავს ყველაფერს. ელემენტარული რაღაცის მოთმენაც არ უნდათ. აძლევენ და აძლევენ მილიარდებს მაგრამ მაგათი საშველი არ არს. სამი დღის წინ 130 მილიარდი მისცეს. ჩვენ ვინ რას გვაძლევს 3 მილიარდი მოგვცეს ომის შემდეგ და ეგ იყო სულ. მაგათ მარტო გუშინ წინ მისცეს 130 მილიარდი და მანამდე კიდევ სამი მაგდენი აქვთ მიცემული. არ ეშველებათ მაინც, იმიტომ რომ ეს ხალხი არის აგრესიული. გამოდის და ყველაფერს ამტვრევს და არაფრის მოთმენა არ უნდა" - განაცხადა დვით ბაქრაძემ.
მან ასევე აღნიშნა, რომ ხალხის მოთმინებამ და გვერდში დგომამ ქვეყანა დანგრევისგან იხსნა.
"თქვენ რომ ესეთი მომთმენები და გვერდში დამდგომები არ იყოთ, აქამდე საბერძნეთი კი არა სომალივით ვიქნებოდით მთლად დაქცეული და გაუბედურებული" - აღნიშნა პარლამენტის თავმჯდომარემ.
დავით ბაქრაძე ოკუპაციის კვირეულის ფარგლებში დაბა ჩოხატაურს 23 თებერვლს ესტუმრა. მან იუნკერ მაკარ ბურჭულაძის საფლავი მოინახულა და მისი სახელობის ქუჩა გახსნა. ამის შემდეგ დავით პარლამენტის თავმჯდომარე ჩოხატაურში შეკრებილ მოსახლეობას იქ არსებულ პრობლემებზე გაესაუბრა.