საქართველოს ვიცე-პრემიერი და საგარეო საქმეთა მინისტრი მიხეილ ჯანელიძე ჩინეთის ტურიზმის ეროვნული ადმინისტრაციის თავმჯდომარეს ლი ძინ ჭაოს შეხვდა.
ლი ჭაომ ჩინეთის ტურიზმის ადმინისტრაციის სახელით ვიცე-პრემიერს გაერო-ს ტურიზმის მსოფლიო ორგანიზაციის გენერალურ მდივნად საქართველოს კანდიდატის არჩევა მიულოცა, რაც, როგორც შეხვედრაზე აღნიშნეს, არა მხოლოდ საქართველოს, არამედ ორგანიზაციის გამარჯვებაცაა.
საქართველოს ვიცე-პრემიერმა თავის მხრივ მადლობა გადაუხადა ჩინეთს მხარდაჭერისთვის. როგორც მიხეილ ჯანელიძემ აღნიშნა, იგი ბედნიერია, რომ ჩვენს მეგობარ ქვეყანაში საქართველოსთვის მნიშვნელოვანი გადაწყვეტილება მიიღეს სწორედ - ჩინეთში, მის ულამაზეს ქალაქ ჩენგდუში.
საგარეო საქმეთა მინისტრმა ხაზი გაუსვა ჩინეთთან წარმატებულ თანამშრომლობას მრავალ სფეროში, მათ შორის, ტურიზმის მიმართულებით და აღნიშნა, რომ საქართველო UNჭთO-ს ფარგლებში შემდგომ თანამშრომლობას გააგრძელებს. მიხეილ ჯანელიძე UNჭთO-ს გენერალური ასამბლეისას ჩინეთის ინიციატივით ტურიზმის მსოფლიო ალიანსის დაფუძნებას მიესალმა და აღნიშნა, რომ საქართველო, როგორც მთავრობის, ასევე, კერძო სექტორის აქტიური ჩართულობით ალიანსთან ითანამშრომლებს და მის საქმიანობაშიც ჩაერთვება.
მხარეებმა ორმხრივი ურთიერთობის საკითხებიც მიმოიხილეს. საქართველოს საგარეო საქმეთა მინისტრმა კიდევ ერთხელ აღნიშნა ჩინეთის ინიციატივაში "გზა და სარტყელი" საქართველოს აქტიური მონაწილეობის მნიშვნელობა. როგორც ჩინეთის ტურიზმის ორგანიზაციის ხელმძღვანელმა განაცხადა, ჩინეთი დიდად აფასებს იმ როლს რაც საქართველოს აქვს აბრეშუმის გზის პროექტში.
ყურადღება გამახვილდა საქართველოსა და ჩინეთს შორის თავისუფალი ვაჭრობის შეთანხმების გაფორმების, აზიის ინფრასტრუქტურისა და ინვესტიციების ბანკში საქართველოს ჩართულობასა და სხვა მრავალ მნიშვნელოვან ერთობლივ პროექტებზე, რაც საქართველოსა და ჩინეთს შორის არსებულ ორმხრივ ინტერესს უსვამს ხაზს- გააღრმავონ და განავითარონ თანამშრომლობა .
ტურიზმის, კულტურისა და ხალხთაშორისი კავშირების განვითარება პრიორიტეტულ მიმართულებად დასახელდა.
მხარეებმა აღნიშნეს, რომ საქართველო, თავისი კულტურული და ისტორიული ძეგლებით ზამთრისა და საზაფხულო კურორტებით საინტერესო ტურისტული დანიშნულების ადგილია ჩინეთისთვის. აღნიშნული მიმართულებით თანამშრომლობის განვითარებას ხელს საქართველოსა და ჩინეთს შორის არსებული პირდაპირი ფრენები უწყობს.
ასევე ხაზი გაესვა ჩინეთის ბიზნეს წრეების მხრიდან საქართველოში ინვესტიციების განხორციელების მზარდ ინტერესს და მათ წარმატებულ საქმიანობას მრავალ სექტორში.