მუსიკალური ფესტივალის, „ჯემ ფესტის“ ორგანიზატორის, გიორგი სიგუას განცხადებით, ტურიზმის ადმინისტრაციის უფროსის სამსახურიდან შესაძლო წასვლა „ჯემ ფესტთან“ ვერ იქნება დაკავშირებული.
ამის შესახებ სიგუამ ტურიზმის დეპარტამენტის ადმინისტრაციის ხელმძღვანელის, გიორგი ჩოგოვაძის თანამდებობიდან შესაძლო წასვლის შესახებ განაცხადა.
მისივე თქმით, უახლოეს დღეებში პრესკონფერენციის გამართვა იგეგმება.
„რა უნდა აკავშირებდეს ტურიზმის ადმინისტრაციის უფროსის სამსახურიდან წასვლას „ჯემ ფესტთან“. „ჩექ ინ ჯორჯიას“ ფარგლებში „ბლექ სი არენამ“ გადაიხადა რამოდენიმე არტისტის ჰონორარი „ჯემ ფესტზე“ დასაკრავად. იმის მონიტორინგი რომ „ბლექ სი არენამ“ გადაუხადა არტისტებს ფული, ვის ევალება მე წარმოდგენა არ მაქვს. ჩემი ვალდებულება „ბლექ სი არენასა“ და სახელმწიფოს წინაშე იყო რომ ფესტივალი ჩამეტარებინა და ჩავატარე. გვქონდა ძალიან წარუმატებელი ფინანსური წელი იმის გათვალისწინებით, რომ ჩვენი დავალიანება ძალიან ბევრს აქვს - ობიექტებს, კაფეებს, ბარებს. ჩვენც დაგვრცა ვალები, თუმცა ამას არსად არ გავურბივართ, არ ვემალებით.
ამ ფესტივალში ბერა ივანიშვილის დაინტერესების შესახებ პირველად მესმნის, ამას არ ვადასტურებ, რა თქმა უნდა. ჩემთვის უცნობია და თუ მე არ ვიცი და ისე ხდება რამე, ვერ გეტყვით.
ზეგ ვიქნები საქართველოში და შეიძლება ამ კვირაშივე მოვასწროთ პრესკონფერენცია.
როგორც გითხარით არ გავურბივართ დავალიანებებს, გვაქვს ბევრი ვალები, თუმცა აბსოლუტურად ყველა დავალიანებას გადავიხდით“ - განაცხადა სიგუამ.
შეგახსენებთ, რომ მედიაში ვრცელდება ინფორმაცია გიორგი ჩოგოვაძის მიერ თანამდებობის დატოვების შესახებ, თუმცა ამ ფაქტს არც ტურიზმის ეროვნულ ადმინისტრაციაში და არც ეკონომიკის სამინისტროში ჯერ-ჯერობით არ ადასტურებენ.