აშშ-ს მოქალაქის, ქართველი ემიგრანტის ივანე ნანუაშვილის წიგნის „რა უნდა იცოდეს ყველამ თავისუფალ სამყაროში რუსეთის შესახებ“ პრეზენტაცია დღეს კულტურისა და ძეგლთა დაცვის სამინისტროში გაიმართება.
ნანუაშვილი, პირადი გამოცდილებიდან გამომდინარე, წიგნში რუსეთზე, როგორც იმპერიალისტურ სახელმწიფოზე მოგვითხრობს. ის ასახავს რუსეთის ბატონობის ისტორიას და აღნიშნავს, რომ ის მსოფლიოში ერთ-ერთი ყველაზე დიდი დამპყრობელია. ავტორს მაგალითად სამშობლო - საქართველო მოჰყავს, რომლის ანექსიაც რუსეთის იმპერიამ მოახდინა.
ივანე ნანუაშვილი 1902 წელს თბილისში დაიბადა. იყო ქართული არმიის ოფიცერი. მეორე მსოფლიო ომის დროს პოლონეთის არმიაში მსახურობდა. 1939-1941 წლებში გერმანელთა ტყვეობაში იყო, საიდანაც გავლენიანმა ქართველებმა იხსნეს. 1951 წელს ამერიკის შეერთებულ შტატებში გაემგზავრა და სიცოცხლის ბოლომდე იქ ცხოვრობდა.
წიგნი კულტურისა და ძეგლთა დაცვის სამინისტროს მხარდაჭერით გამოიცა.