ყოველწლიური ლიტერატურული პრემია „საბას“ ჟიურიმ კონკურსის 3 ნომინაციის ფინალისტები დაასახელა.
ორგანიზატორების ინფორმაციით, ისინი ერთმანეთს „საბას“ ჯილდოს - საუკეთესო პროზაული კრებულის, რომანის და ლიტერატურული კრიტიკის ნომინაციებში შეეცილებიან.
„თიბისი ბანკის“ მიერ დაწესებული პრემია „საბა“ წელსაც ტრადიციულად, 9 ნომინაციაში გაიცემა. დანარჩენი ნომინაციების ფინალისტებს კონკურსის ჟიური ივნისში გამოაცხადებს.
თითოეულ ნომინაციაში გამარჯვებულის ვინაობა კი, „საბას” დაჯილდოების საზეიმო ცერემონიაზე გახდება ცნობილი, რომელიც „თიბისი ბანკის“ სათაო ოფისის ეზოში გაიმართება.
„საბას” გამარჯვებული ავტორები ბანკისგან სოლიდურ ფულად პრემიას მიიღებენ. წლევანდელი საპრიზო ფონდი 40 ათასი ლარია, რომელიც 9 გამარჯვებულს გადაეცემა.
კონფიდენციალურია კონკურსის 5-კაციანი ჟიური, რომელიც „საბა“-ზე წარმოდგენილ 200-მდე წიგნს უკვე 3 თვეა განიხილავს.

3 ნომინაციის ფინალისტები ზაზა ბურჭულაძე, აკა მორჩილაძე, ირაკლი სამსონაძე და ზურაბ ქარუმიძე, ზვიად კვარაცხელია, მიხო მოსულიშვილი, ივანე ამირხანაშვილი და სხვები არიან.