გორგასლის მოედანზე დღეს „ვარდატონის“ დღესასწაულთან დაკავშირებით კონცერტი გაიმართება.
კონცერტში მონაწილეობას სომხეთის რესპუბლიკიდან ჩამოსული სტუმრები მიიღებენ - აშუღური სიმღერის ანსამბლები „საიათნოვა“ და „ჰავასი“ , ასევე ანსამბლი „ქსოვრელები“ და ქართველი მომღერლები, რომელთა რეპერტუარში საიათნოვას სიმღერები და ლექსებია შესული.
ამასთანავე, ღონისძიებაში მონაწილეობას მიიღებენ საქართველოს სომეხთა ეპარქიასთან არსებული კულტურის ცენტრის „ჰაიარტუნი“ მომღერლები, რომლებიც საიათნოვას სიმღერებს ქართულ და სომხურ ენებზე შეასრულებენ.
როგორც „ნიუსპრესს“ კულტურისა და ძეგლთა დაცვის სამინისტროდან აცნობეს, დღესასწაულთან დაკავშირებით სურბ გევორგის სახელობის ეკლესიაში წირვა ჩატარდება, შემდეგ კი ეკლესიის ეზოში მდებარე საიათნოვას საფლავთან პარაკლისის გადახდა იგეგმება.
ღონისძიება იმართება საქართველოს კულტურისა და ძეგლთა დაცვის სამინისტროს, სომხეთის რესპუბლიკის კულტურის სამინისტროს, საქართველოში სომხეთის რესპუბლიკის საელჩოს, თბილისის მერიისა, სომეხთა სამოციქულო მართლმადიდებელი წმიდა ეკლესიის საქართველოს ეპარქიისა და საქართველოს სომეხთა კავშირის მხარდაჭერით.