კულტურისა და ძეგლთა დაცვის სამინისტროს მხარდაჭერით და მწერალთა სახლის ორგანიზებით, წელს პირველად, თბილისის საერთაშორისო ლიტერატურული ფესტივალი ჩატარდება.

სამინისტროს ინიციატივით, წელსვე ყოველწლიური ლიტერატურული პრემია დაწესდება და სხვადასხვა ნომინაციაში გაიცემა.

კულტურის სამინისტროს პრესსამსახურის ინფორმაციით, ამ თემებთან დაკავშირებით ხვალ, სამინისტროში პრესკონფერენცია გაიმართება, რომელსაც კულტურისა და ძეგლთა დაცვის მინისტრი მიხეილ გიორგაძე და მწერალთა სახლის დირექტორი ნატაშა ლომოური გაუძღვებიან.

ღონისძიებას მწერლები და სხვა მოწვეული სტუმრები დაესწრებიან.

თბილისის საერთაშორისო ლიტერატურული ფესტივალი მიმდინარე წლის 18-23 მაისს ჩატარდება.

უწყების ინფორმაციით, ფესტივალის ფარგლებში თბილისს 25 - მდე უცხოელი მწერალი და პოეტი ეწვევა, მათ შორის, ლიტერატურული წრეებისათვის კარგად ცნობილი ბელარუსი მწერალი სვეტლანა ალექსიევიჩი, უკრაინელი ავტორი სერგეი ჟადანი, ფრანგი მწერალი ფილიპ ბესონი, აგრეთვე, ამერიკელი, გერმანელი, ინგლისელი, იტალიელი და პოლონელი ავტორებიც.
როგორც სამინისტროში აცხადებენ, ფესტივალი ხელს შეუწყობს მსოფლიო ლიტერატურული სამყაროს დაინტერესებას ქართული მწერლობით, მეორე მხრივ კი ქართველ ავტორებსა და მკითხველს მისცემს შესაძლებლობას, თანამედროვე უცხოელ მწერლებთან უშუალო კონტაქტი დაამყარონ.

ფესტივალის მხარდამჭერები გოეთეს ინსტიტუტი, ბრიტანეთის საბჭო, ფრანგული ინსტიტუტი, აშშ-ს და იტალიის საელჩოები, ბოშის ფონდი და პოლონეთის წიგნის ინსტიტუტი არიან.

კონკურსის შედეგებს მწერალთა სახლის მიერ წარმოდგენილი ჟიური შეაფასებს, რომელიც 5 წევრისგან შედგება.

ჟიურის შემადგენლობა ყოველწლიურად შეიცვლებამასში ის მწერლები და ლიტერატორები შევლენ, რომელთა ნაწარმო. ებიც ამ წელს საკონკურსოდ არ განიხილება. გამარჯვებულის გამოვლენა კი, ფარული კენჭისყრით მოხდება.

პროექტის მიზანი მიმდინარე ლიტერატურული პროცესების მხარდაჭერა, შემოქმედებითი პროცესების გააქტიურება და ახალი, საინტერესო ლიტერატურული ნაწარმოებების შესაქმნელად ავტორთა წახალისებაა.