კულტურისა და ძეგლთა დაცვის სამინისტროში, დღეს პროექტ „მცოცავი საზღვარი“-ს შესახებ, რომლითაც საქართველო ვენეციის ხელოვნების საერთაშორისო ბიენალეზე წარდგება, პრესკონფერენცია გაიმართება.

პრესკონფერენციას საქართველოს კულტურისა და ძეგლთა დაცვის მინისტრი მიხეილ გიორგაძე, ვენეციის ხელოვნების საერთაშორისო ბიენალეს კომისარი ანა რიაბუშენკო და პროექტის „მცოცავი საზღვარი“ ავტორები გაუძღვებიან.

ნაციონალური პავილიონი 8 მაისს 17:00 საათზე გაიხსნება, ვენეციის ხელოვნების საერთაშორისო ბიენალეს ოფიციალური გახსნის ცერემონია კი 9 მაისს არის დაგეგმილი.

პროექტის ავტორები, კურატორი - ნია მგალობლიშვილი, არტისტები - რუსუდან ხიზანიშვილი, ირაკლი ბლუიშვილი, დიმიტრი ჩიკვაიძე, ნია მგალობლიშვილი, სოფია შევარდნაძე, ია ლიპარტელიანი და ჯოზეფ საბია ვენეციაში, 2 მაისს გაემგზავრებიან.

ბიენალეზე საქართველოს სახელით წარსადგენი პროექტის გამოსავლენად შექმნილმა საკონკურსო კომისიამ შესული 12 პროექტიდან საუკეთესო, ფარული კენჭისყრითა და ხმათა უმრავლესობით შეარჩია.

ვენეციის 56-ე საერთაშორისო ხელოვნების გამოფენა იტალიაში მიმდინარე წელს 9 მაისიდან 22 ნოემბრამდე გაიმართება, - ქართული პავილიონი ვენეციის ბიენალეს ერთ-ერთ მთავარ საგამოფენო სივრცეში - „არსენალეზე“ განთავსდება.

ვენეციის ბიენალეს წლევანდელი თემაა - „მომავალი სამყაროს მრავალფეროვნება (All the world’s futures)“.

საქართველოს კულტურისა და ძეგლთა დაცვის სამინისტროს მხარდაჭერით, ვენეციის თანამედროვე ხელოვნების 56-ე საერთაშორისო ბიენალეზე კიდევ ერთი ქართული პროექტი წარდგება.

ბიენალეს ოფიციალური პარალელური პროგრამის ფარგლებში წარდგენილ საერთაშორისო გამოფენაში - „ნახტომი შეუცნობადში“ მონაწილეობას მხატვარი ილია ზაუტაშვილი მულტიმედიური პროექტით „საზოგადოებრივი აზრი“ მიიღებს.