თეატრალური პრემია „დურუჯის“ ლაურეატების გამოსავლენად განაცხადებების მიღება დასრულდა. სულ, კომისიაში 19 თეატრის 30 განაცხადი შევიდა.

აღნიშნულთან დაკავშირებით დღეს პრესკონფერენცია გაიმართება.

დაჯილდოების ცერემონია „ბანკ რესპუბლიკასთან“ არსებული საქველმოქმედო ფონდ „ცისკრის“ ინიციატივით, წელს მეოთხედ გაიმართება.

როგორც „ნიუსპრესს“ „დურუჯის“ პარტნიორი კომპანია „რედიქსიდან“ აცნობეს, ჟიური კანდიდატებს სხვადასხვა ნომინაციებში გამოავლენს.

საუკეთესო სარეჟისორო ნამუშევრისთვის პრემა 14 ათასი ლარია, საუკეთესო მსახიობ ქალს - 2 000 ლარი გადაეცემა, საუკეთესო მსახიობ მამაკაცს - 2 000 ლარი, სეზონის განმავლობაში დადგმული საუკეთესო ქართული თანამედროვე პიესის ავტორი 2 000 ლარს მიიღებს, საუკეთესო მხატვარს კომპანია „ჯეოსელის“ დაწესებული სპეციალური პრიზი გადაეცემა.

საუკეთესო ახალგაზრდა რეჟისორი კულტურისა და ძეგლთა დაცვის სამინისტროს მიერ დაწესებული სპეციალური პრიზით - 10 000 ლარით დაჯილდოვდება. აღნიშნულ ნომინაციაზე წარდგენილი რეჟისორის ასაკი 35 წელს არ უნდა აღემატებოდეს.

4 წლის წინ პრემია „დურუჯი“ მხოლოდ ერთ ლაურეატს გადაეცემოდა. შარშან ლაურეატების რაოდენობა ხუთამდე გაიზარდა, წელს კი, კიდევ ერთი ნომინაცია - წლის საუკეთესო მხატვარი დაემატა.