საქართველოს განათლების, მეცნიერების, კულტურისა და სპორტის სამინისტროსა და შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის მხარდაჭერით, მომავალ წელს, ვაგიფ მუსტაფა ზადეს 80 წლის იუბილესთან დაკავშირებული ჯაზის საღამო ჩატარდება.

მუსტაფა-ზადემ თავისი სიცოცხლის ნახევარი საქართველოში გაატარა და მნიშვნელოვანი როლი შეასრულა საქართველოში ჯაზის განვითარებაში. მუსტაფა ზადე 1965 წელს, კონსერვატორიის დამთავრების შემდეგ, თბილისში ჩამოვიდა და იმ დროისთვის ყველაზე პოპულარულ ჯგუფ „ორერაში“ უკრავდა. ამავდროულად, მან საქართველოს ფილარმონიასთან ჯაზ-ტრიო „კავკასია“ ჩამოაყალიბა.

ვაგიფ მუსტაფაზადემ აღმოსავლური ჯაზის ერთ-ერთი თვითმყოფადი და საინტერესო სკოლა შექმნა და მნიშვნელოვანი გავლენა იქონია იმდროინდელ ქართველ ჯაზმენებზე. მანვე ჩაუყარა საფუძველი ახალ მუსიკალურ ჟანრს– აზერბაიჯანულ ჯაზ-მუღამს.1966 წელს ჯაზ-ტრიო „კავკასიასთან“ ერთად გამოსცა ერთი ალბომი და ერთი მინიონი (მუსტაფა-ზადე - ფორტეპიანო, გენო ნადირაშვილი - ბასი, ფელიქს შაბსისი - დასარტყამი). ეს სსრკ-ში გამოცემული ერთ-ერთი პირველი ჯაზ-ალბომი და მისი პირველი ჩანაწერია. 1978 წელს მან მონაწილეობა მიიღო თბილისის პირველ ჯაზ-ფესტივალში.

მუსტაფა-ზადე სსრკ-ში პირველი ჯაზის შემსრულებელი იყო, რომელსაც მიენიჭა დამსახურებული არტისტის წოდება. ასევე, მიღებული აქვს ჯილდოები, პრემიები და პრიზები: ჯაზ-კომპოზიციების საერთაშორისო კონკურსი (მონაკო), I პრემია, პრიზი „თეთრი როიალი“, სსრკ დამსახურებული არტისტი, ფესტივალი „ტალინი-67,“ ჯაზ-ფესტივალი „თბილისი-78,“ ფესტივალი „ტალინი-66“ (ტრიო „კავკასიასთან“ ერთად), ფესტივალი „ჯაზი-69“ (ბაქო).

2017 წელს საქართველოს ეროვნულ მუზეუმში ვაგიფ მუსტაფაზადეს შესახებ გადაღებული დოკუმენტური ფილმის პრემიერა შედგა სახელწოდებით „Vagif, as I Know Him“. პიანისტი და კომპიზიტორი 1979 წელს, 39 წლის ასაკში გარდაიცვალა.