საქართველოს საელჩოს ორგანიზებით, ირლანდიაში, ტრინიტი კოლეჯის ლიტერატურულ კლუბში თანამედროვე ქართველი მწერლის , ზურაბ ქარუმიძის შემოქმედებითი საღამო გაიმართა.

საქართველოს საელჩოს ცნობით, შემოქმედებით საღამოზე ზურაბ ქარუმიძემ დამსწრე აუდიტორიას გააცნო ინფორმაცია ქართული ენისა და უნიკალური დამწერლობის შესახებ, ისაუბრა ახლახან ფრანკფურტის წიგნის ბაზრობაზე საქართველოს, როგორც საპატიო სტუმრის მიერ წარმოდგენილი ლიტერატურული და კულტურული პროგრამის წარმატებაზე. მწერალმა მიმოიხილა საკუთარი შემოქმედება და თავის მხრივ, გამოხატა განსაკუთრებული ინტერესი და სიყვარული ირლანდიური ლიტერატურისა და კულტურისადმი.

ზურაბ ქარუმიძემ ღონისძიების ორგანიზატორებს დუბლინში ჩამოსვლისა და ქართული ლიტერატურის პოპულარიზაციისადმი მიძღვნილ საღამოში მონაწილეობის შესაძლებლობისთვის მადლობა გადაუხადა.

ღონისძიების დასასრულს, გამომცემლობამ “Dalkey Archive Press” გაავრცელა ზურაბ ქარუმიძის ინგლისურენოვანი რომანი, რომელზეც ქართველმა მწერალმა საკუთარი ავტოგრაფი დააფიქსირა.

ღონისძიებას, რომელიც ქართული წიგნის ეროვნულ ცენტრის, ტრინიტი კოლეჯის ლიტერატურის კათედრისა და გამომცემლობის “Dalkey Archive Press” ერთობლივი ძალისხმევით ჩატარდა, ადგილობრივი მწერლები, ლიტერატურის კრიტიკოსები, სტუდენტები და მედიის წარმომადგენლები ესწრებოდნენ.