ცნობილი ქართველი რეჟისორი რობერტ სტურუა დღეს 74 წლის გახდა.
რეჟისორი 1938 წელს 31 ივლისს თბილისში დაიბადა. შოთა რუსთაველის სახელობის  სახელმწიფო დრამატული თეატრში სტურუამ 1962 წლიდან დაიწყო მუშაობა, ხოლო 1979 წლიდან თეატრის მთავარი რეჟისორი,1980 წლიდან კი, სამხატვრო ხელმძღვანელი გახდა.
1965 წელს რუსთაველის თეატრის სცენაზე სტურუამ ა. მილერის სეილემის პროცესი დადგა, რამაც რეჟისორს პირველი წარმატება მოუტანა.
თეატრალური ფორმის ოსტატობა გამოჩნდა მის მეორე მნიშვნელოვან ნამუშევარში, დ. კლდიაშვილის „სამანიშვილის დედინაცვალი“, რომელიც ქართული თეატრის გამოჩენლ რეჟისორთან თემურ ჩხეიძესთან ერთად დადგა. მნიშვნელოვანი წარმატება მოჰყვა მის სპექტაკლს „ხანუმა“.
მას გამორჩეული აღიარება მოუტანა პ. კაკაბაძის „ყვარყვარემ“, ბრეხტის კავკასიური ცარცის წრემ (1975) და შექსპირის „რიჩარდ III“-მ (1979).
1980-იანი წლები განსაკუთრებით ნაყოფიერი იყო სტურუას შემოქმედებაში. ამ პერიოდში დაიდგა - თ. ჭილაძის „როლი დამწყები მსახიობის ქალისთვის“ (1980), მ. შარპოვის „ცისფერი ცხენები წითელ ბალახზე“ (1980), სტურუას, ფოფხაძისა და ვარსიმაშვილის ვარიაციები თანამედროვე თემაზე (1981), რ. იბრაგიმბეკოვის „დაკრძალვა კალიფორნიაში“ (1983) და ა.შ.
1987 წელს სტურუამ „მეფე ლირი“ დადგა, 1994 წელს გოგებაშვილის „დედაენის“ მიხედვით „იაკობის სახარება“, 1996 წელს „ლამარა“ შეიქმნა, 1997 წელს ლ. თაბუკაშვილის პიესის მიხედვით დადგმული „მერე რა, რომ სველია სველი იასამანი“.
1998 წელს მან ახალგაზრდა რეჟისორ დ. საყვარელიძესთან ერთად სტურუამ პიესა „ქალი-გველი“ დადგა. ამავე წელს მოსკოვში თეატრ „სატირიკონში“ სტურუას ჰამლეტი დაიდგა.
რეჟისორი ბევრს მუშაობდა საზღვარგარეთ, მსოფლიოს სხვადასხვა თეატრებში.
რობერტ სტურუას მიღებული აქვს საქართველოს სახელმწიფო პრემია, სსრკ-ს სახელმწიფო პრემია, რუსეთის ფედერაციის სახელწიფო პრემია, კოტე მარჯანიშვილის სახელობის პრემია, შოთა რუსთაველის სახელობის პრემია, მიხეილ თუმანიშვილის სახელობის პრემია, ალ. ყაზბეგის სახელობის პრემია და სხვა.
შოთა რუსთაველის სახელობის სახელმწიფო დრამატული თეატრის სამხატვრო ხელმძღვანელი რობერტ სტურუა თანამდებობიდან 2011 წელს გაათავისუფლეს.