საქართველოს განათლების, მეცნიერების, კულტურისა და სპორტის სამინისტროს მხარდაჭერით, ფრანკფურტის საერთაშორისო წიგნის ბაზრობის საპატიო სტუმრის პროგრამის ფარგლებში, საქართველოს ეროვნული მუზეუმი სამი გამოფენით და საგანმანათლებლო პროგრამებითაა წარმოდგენილი.

განათლების სამინისტროს პრესსამსახურის ცნობით, გამოფენებიდან ერთ-ერთი, ზენკენბერგის საბუნებისმეტყველო მუზეუმში (Naturmuseum Senckenberg) 10 ოქტომბერს გაიხსნა და 18 ნოემბრამდე გაგრძელდება. მუზეუმში წარმოდგენილი იქნება ადამიანის წინაპართა ისტორია და მათი მოგზაურობა აფრიკიდან კავკასიის გავლით, დმანისში აღმოჩენილი 1 800 000 წლის წინანდელი ჰომინინის ნაშთები. არქეოლოგიის მუზეუმი (Archäologisches Museum Frankfurt am Main) კი გამოფენას ღვინისა და ოქროს წარმოების შესახებ 10 თებერვლამდე უმასპინძლებს, სადაც წარმოდგენილი იქნება სხვადასხვა ექსპონატი ქვის ხანიდან ბრინჯაოს ხანის ჩათვლით. დამთვალიერებელი 10 თებერვლამდე კიდევ ერთ გამოფენას იხილავს, ამჯერად, ლიბიგჰაუსის მუზეუმში (Skulpturensammlung Liebghaus), სადაც ის ძველ მსოფლიოში ანტიკურ სამყაროსა და მედეას მითოლოგიზებულ სახეს გაეცნობა.