მიმდინარე წლის ფრანკფურტის წიგნის ბაზრობაზე ქართული ფილმების რეტროსპექტივა გრძელდება. გერმანიის კინოსმუზეუმში კოტე მიქაბერიძის ფილმის "ჩემი ბებია" ჩვენება გაიმართა.

კინოჩვენებას საქართველოს განათლების, მეცნიერების, კულტურისა და სპორტის მინისტრის მოადგილეები მიხეილ გიორგაძე და ლევან ხარატიშვილი, ასევე, კინოცენტრის დირექტორი, ზურაბ მაღალაშვილი დაესწრნენ.

განათლების სამინისტროს პრესსამსახურის ცნობით, სოსო დუმბაძისა და ნინო ძანძავას წიგნის პრეზენტაციაც მოეწყო, რომელიც ცნობილი ქართველი კინორეჟისორის კოტე მიქაბერიძის ცხოვრებასა და შემოქმედებას ეძღვნება. წიგნი ფრანკფურტის წიგნის ბაზრობაზე წარსადგენად ინგლისურ ენაზე გამოიცა. ქართული ფილმების რეტროსპექტივას ეროვნული კინოცენტრი, გერმანიის კინოსმუზეუმთან და კინოსა და ვიდეოხელოვნების ინსტიტუტ “არსენალთან” ერთად 3 ოქტომბრიდან 31 ოქტომბრამდე მართავს.

ჩვენებები და დისკუსიები კლასიკურ პერიოდს, უხმო კინოდან საქართველოს მიერ 1991 წელს დამოუკიდებლობის მოპოვებამდე მოიცავს. ნაჩვენები იქნება 20-ზე მეტი ფილმი, მათ შორის ავანგარდული უხმო კინოს ნიმუშები. განსაკუთრებული ყურადღება დაეთმობა საბჭოთა კავშირის პერიოდში დამკვიდრებულ ე.წ. ფორმალიზმსა და ცენზურის გავლენას ქართულ კინოზე. საუბარი იქნება რეჟისორების მიხეილ ჭიაურელის, მიხეილ კალატოზიშვილის და ნიკოლოზ შენგელაიას შემოქმედებაზე. ასევე, 50-იანთა თაობის რეჟისორებზე, რომლებმაც ქართულ კინოში ახალი სიტყვა თქვეს. გარდა სრულმეტრაჟიანი ფილმებისა, ნაჩვენები იქნება დოკუმენტური და მოკლემეტრაჟიანი ფილმების პროგრამა. ფილმების ავტორებთან დაგეგმილია ლექციები, შეხვედრები და მასტერკლასები.