საქართველოს გოეთეს ინსტიტუტში ევროკავშირის კულტურულ ინსტიტუციათა გაერთიანების (EUNIC -European Union National Institutes for Culture) ორგანიზებით დღეს ენების ევროპული დღე გაიმართება. ღონისძიებას ოფიციალურად გახსნიან საქართველოს განათლების, მეცნიერების, სპორტისა და კულტურის მინისტრის მოადგილე ალექსანდრე თევზაძე, ევროკავშირის კულტურულ ინსტიტუციათა გაერთიანების პრეზიდენტი საქართველოში ბარბარა ფონ მიუნჰაუზენი, ევროპის საბჭოს ოფისის ხელმძღვანელი საქართველოში კრისტიან ურსე.



ღონისძიებას მხარს უჭერს საქართველოს განათლების, მეცნიერების, კულტურისა და სპორტის სამინისტრო და ევროკავშირის დელეგაცია საქართველოში.



გოეთეს ინსტიტუტში ენების ევროპული დღისადმი მიძღვნილი პროგრამა მთელი დღის განმავლობაში მოიცავს კონკურსებს, ვორქშოფებს და მრავალ სხვა გასართობ და შემეცნებით აქტივობებს ევროპის ლინგვისტური და კულტურული მრავალფეროვნების აღსანიშნავად, რომელშიც მონაწილეობას მიიღებენ 8-დან 18 წლამდე ასაკის მოსწავლეები.



წლევანდელი ღონისძიების სპეციალური სტუმარია ფსიქოლოგი თამარ გაგოშიძე, რომელიც მშობლებისთვის გამართავს საჯარო ლექციას თემებზე: მოტივაციის როლი სწავლების პროცესში; უცხოური ენის შესწავლის ოპტიმალური ასაკი და აუცილებელი წინაპირობები.



ენების ევროპული დღე ევროპის საბჭოს მიერ 2001 წელს ევროპის კულტურული მრავალფეროვნებისა და მრავალენოვნების აღსანიშნავად დაწესდა. ეს დღე ყოველწლიურად 26 სექტემბერს აღინიშნება და მისი მიზანია ევროპის საბჭოს 47 წევრ ქვეყანაში მცხოვრები 800 მილიონი ადამიანის წახალისება - ისწავლონ უფრო მეტი ენა ნებისმიერ ასაკში, სკოლასა თუ მის ფარგლებს გარეთ. ლინგვისტური მრავალფეროვნება კულტურათაშორისი თავისებურებების და ევროპის მდიდარი კულტურული მემკვიდრეობის ერთ-ერთი უმთავრესი კომპონენტია, ამდენად, ევროპის საბჭო ფართოდ უწევს პოპულარიზაციას პლურილინგვალიზმს მთელს ევროპაში.