საქართველოს საელჩოს ორგანიზებით, ნიდერლანდების სამეფოში მშვიდობის საერთაშორისო დღისადმი მიძღვნილი გამოფენა „The Right To Peace” გაიმართა. ღონისძიების ფარგლებში, ქართველი ხელოვანების ნამუშევრები იყო წარმოდგენილი.

ღონისძიებაზე მოწვეულ სტუმრებს სიტყვით საქართველოს საგანგებო და სრულუფლებიანმა ელჩმა, კონსტანტინე სურგულაძემ მიმართა.

„საელჩოში მოწვეულ ხელოვანებს შორის არიან აფხაზეთიდან დევნილი მხატვრები, რომელთაც ომის გამო საკუთარი სახლების დატოვება და სხვა ქვეყანაში წასვლამოუწიათ. ჩვენ გადავწყვიტეთ მშვიდობის საერთაშორისო დღეს მშვიდობის უფლებისადმი მიძღვნილი გამოფენა გაგვეკეთებინა და კიდევ ერთხელ ხაზი გაგვესვა, რომ მშვიდობას ჩვენ ქვეყანაში საფრთხე არასოდეს უნდა დაემუქროს, ვინაიდან მშვიდობას ალტერნატივა არ გააჩნია. ჩვენ უკეთესი მომავლის შექმნისათვის უნდა ვიმუშაოთ,“-განაცხადა ელჩმა.

გამოფენას, რომელზეც წარმოდგენილი იყო დავით ჩიჩუას, გოჩა ლაღიძის, გიორგი შენგელიას, თეა შამუგიას, ზურა ცოცხალაშვილის, მარინა თამლიანი-გამისონიას და ამირან ჯანაშვილის ნამუშევრები, დიპლომატიური კორპუსის, სამთავრობო და ბიზნეს სექტორის, კულტურის, საგანმანათლებლო სფეროს და მედიის წარმომადგენლები ესწრებოდნენ.

ქართველ ხელოვანთა ნამუშევრების ექსპოზიცია საქართველოს საელჩოში 19 ოქტომბრამდე გაგრძელდება.