თურქეთში ქალაქ ინეგოლში „ინეგოლის კავკასიის, ფოლკლორისა და კულტურის“ ასოციაციის ორგანიზებით ფოლკლორის საერთაშორისო ფესტივალი გაიმართა, რომელშიც მონაწილეობდნენ ასოციაციასთან არსებული ფოლკლორული ანსამბლი - „ჩვენებურები“ და შემოქმედებითი კოლექტივები საქართველოდან.

ღონისძიებებს ესწრებოდნენ თურქეთის სხვადასხვა რეგიონში მცხოვრები ქართველები. მათ მისასალმებელი სიტყვით მიმართეს საქართველოს საგანგებო და სრულუფლებიანმა ელჩმა თურქეთის რესპუბლიკაში, ირაკლი კოპლატაძემ, დიასპორასთან ურთიერთობის დეპარტამენტის დირექტორის მოადგილემ, ვარლამ ბაძაღუამ, საქართველოს პარლამენტის წევრმა, ანზორ ბოლქვაძემ, ქ. ინეგოლის მერმა ალფერ თაბანმა, ინეგოლის გამგებელმა ალი აქჩამ და ბურსის მერმა, ალი ნური აქთაშმა.

ვიზიტის ფარგლებში გაიმართა შეხვედრები ინეგოლის მერთან ალფერ თაბანთან და ქ. ინეგოლის გამგებელთან ალი აქჩასთან.

ასევე, ქ. ინეგოლის სოფ. ჰაირიეში ცნობილი თურქეთელი ქართველი მოღვაწის, აჰმეთ ოზქანის (მელაშვილი) ხსოვნისადმი მიძღვნილი ღონისძიება გაიმართა. დიასპორასთან ურთიერთობის დეპარტამენტის წარმომადგენლებმა ყვავილებით შეამკეს აჰმედ ოზქან მელაშვილის საფლავი.