საქართველოს ეროვნული საინვესტიციო სააგენტოს მოწვევით და ინიციატივით, საქართველოში მეორე ინდური ფილმის გადაღება მიმდინარეობს.  
როგორც „ნიუსპრესს“ საინვესტიციო სააგენტოდან აცნობეს, ინდური ბლოქბასტერის - “BILLA”-ს მეორე ნაწილის გადაღების შემდეგ ინდოელი პროდიუსერები და გადამღები ჯგუფი ამჯერად, ისტორიული ჟანრის ფილმის - "Irandam Ullagam" - ”სხვა სამყაროს” გადასაღებად ჩამოვიდა.
საინვესტიციო სააგენტოს ინფორმაციით, ფილმის ბიუჯეტი 5 მლნ აშშ დოლარს შეადგენს. მისი რეჟისორი სელვა რაჯავან კრიშანამურტია.
ინდოელი პროდიუსერები ქართულ მხარესთან, მათ შორის, სტუდია „მეტროსა” და „ქართულ ფილმთან” თანამშრომლობენ. საქართველოდან გადაღებებში 50 კინემატოგრაფისტია ჩართული.
ფილმში მოქმედება შუასაუკუნეების საქართველოში ვითარდება. სცენებში ქართველი მეფე ფიგურირებს. ფილმში 3D გრაფიკას გამოიყენებენ.
ამ ეტაპზე გადაღება კახეთში მიმდინარეობს. გადასაღებად ასევე, თუშეთში – დართლო და მისი მიმდებარე ტერიტორიები, ჯავახეთში – ვარძიის კომპლექსი და მიმდებარე ტერიტორიაა შერჩეული.
ფილმისთვის მსახიობები სტუდიამ ”G არტ” შეარჩია. მასში 70-მდე ქართველი მსახიობი და 50 კასკადიორი მონაწილეობს, ხოლო რამდენიმე სცენაში 300-მდე ადამიანს გადაიღებენ.