შატილის კომპლექსის ცენტრალური კოშკის სამხრეთ კედლის მდგომარეობა არც ისე მძიმეა, როგორც ამას მედიასაშუალებები აცხადებენ, აღნიშნა  „ნიუსპრესთან“ საუბრისას კულტურული მემკვიდრეობის დაცვის ეროვნული სააგენტოს საზოგადოებასთან ურთიერთობის სამსახურის ხელმძღვანელმა ნათია მურაჩაშვილმა.

„ადგილზე ჩასულმა სპეციალისტებმა აღმოაჩინეს, რომ ჩამოშლილი ნაწილი ბევრად მცირეა, ვიდრე ამას ელოდნენ“ - განაცხადა მურაჩაშვილმა.
მისი თქმით, კედელი მთლიანად ჩამონგრეული არ არის.

სარესტავრაციო სამუშაოები, სავარაუდოდ, რამდენიმე კვირის შემდეგ დაიწყება და შატილის კომპლექსის 3-4 კოშკი, რომლებიც ყველაზე მძიმე მდგომარეობაშია სექტემბრის ბოლოსთვის აღდგენილი იქნება.

შატილის კომპლექსის დაზიანების მასშტაბების შესასწავლად დღეს შატილში კულტურული მემკვიდრეობის დაცვის ეროვნული სააგენტოს მონიტორინგის სამსახურის წარმომადგენლები ჩავიდნენ.

სხვადასხვა წყაროებით გავრცელებული ინფორმაციის თანახმად, ცენტრალური კოშკის სამხრეთი კედელი მთლიანად ჩამოიშალა.