თბილისის ოპერისა და ბალეტის სახელმწიფო თეატრის სამხატვრო ხელმძღვანელის, პრიმა-ბალერინა ნინო ანანიაშვილის განცხადებით, პროექტმა Check in Georgia მას საშუალება მისცა გასულ წელს ბალეტის ფესტივალი პირველად ჩაეტარებინა.
ამის შესახებ ანანიაშვილმა Check in Georgia 2018 წლის პრეზენტაციას განაცხადა.
„ბედნიერები ვართ, რომ საქართველოში მართლაც ბევრი ფესტივალია და კულტურა ასეთ მაღალ დონეზე გვაქვს.
„ჩექინ ჯორჯია“ არის პროექტი, რომელმაც საშუალება მომცა გასულ წელს პირველად ჩამეტარებინა ბალეტის ფესტივალი. დიდი ხანი მინდოდა ამის გაკეთება, მაგრამ იმის გამო, რომ ოპერის თეატრში ამის საშუალება არ იყო, ეს ვერ შევძელი. თუმცა დღესდღეობით თეატრი უკვე აღჭურვილია თანამედროვე ტექნიკითა და შესაძლებლობებით. დღეს ნამდვილად გვაქვს 21-ე საუკუნის შესაბამისი პირობები და აღარ გვრცხვენია დავპატიჟოთ უმაღლესი დონის მოცეკვავე თუ მომღერალი“ - აღნიშნა ნინო ანანიაშვილმა.


თბილისის ოპერისა და ბალეტის სახელმწიფო თეატრის სამხატვრო ხელმძღვანელმა სიტყვით გამოსვლისას ასევე აღნიშნა, რომ მოხარული იქნება, თუ საბალეტო ფესტივალს მუდმივი სახე მიეცემა და ფესტივალის მაყურებელთა შორის იქნებიან ტურისტებიც, რომლებიც სპეციალურად ჩამოვლენ ფესტივალის სანახავად.


Check in Georgia 2018 წელს 300-მდე ღონისძიებას, მათ შორის საბალეტო ფესტივალს უმასპინძლებს. პროექტის წლევანდელი ბიუჯეტი 20 მილიონი ლარია.